കോതമംഗലം: ലൗ ജിഹാദിനെത്തുടര്ന്ന് കോതമംഗലം കറുകടത്ത് ആത്മഹത്യ ചെയ്ത ടിടിസി വിദ്യാര്ത്ഥിനി സോന ഏല്ദോസിന്റെ വീട് കേന്ദ്ര ന്യൂനപക്ഷകാര്യ സഹമന്ത്രി ജോര്ജ് കുര്യന് സന്ദര്ശിച്ചു.
ഇന്നലെ രാവിലെ സോനയുടെ വീട്ടിലെത്തിയ കേന്ദ്രമന്ത്രി വിവരങ്ങള് ചോദിച്ചറിയുകയും കുടുംബത്തെ ആശ്വസിപ്പിക്കുകയും ചെയ്തു. കുട്ടിയുടെ കുടുംബം എന്ഐഎ അന്വേഷണം ആവശ്യപ്പെടുകയും ചെയ്തു.
കേന്ദ്ര ഇടപെടല് ഉണ്ടാകുമോ എന്ന മാധ്യമ പ്രവര്ത്തകരുടെ ചോദ്യത്തിന് അതിന് നിയമമുണ്ട്, എഫ്ഐആര് അടിസ്ഥാനത്തിലാണ് എന്ഐഎ ഇടപെടുന്നത്, എഫ്ഐആര് എങ്ങനെ ആണെന്നുള്ളത് മനസിലാക്കണം. ഇപ്പോള് എഫ്ഐആര് അസ്വാഭാവിക മരണത്തിനാണ് കേസെടുത്തത്. അതിന്റെ നടപടിക്രമങ്ങള് പൂര്ത്തിയാക്കിയാല് മാത്രമേ എന്ഐഎക്ക് ഇടപെടാന് സാധിക്കൂ എന്ന് ജോര്ജ് കുര്യന് പറഞ്ഞു.
എഫ്ഐആറിലെ വിവരങ്ങളാണ് കേന്ദ്രം ആദ്യം പരിശോധിക്കുന്നത്. പിന്നീട് ഡിജിപിക്ക് നല്കിയ പരാതികൂടി പരിശോധിക്കപ്പെടും. ഇതിനു വളരെ കൃത്യമായ നിയമനടപടിയുണ്ട്. അതില് നിന്നു മാത്രമേ കാര്യങ്ങള് ചെയ്യാന് സാധിക്കൂ. ഇക്കാര്യത്തില് രാഷ്ട്രീയ ഇടപെടല് സാധ്യമല്ല.
എന്ഐഎ അന്വേഷണത്തില് സംസ്ഥാന സര്ക്കാരാണ് തീരുമാനമെടുക്കേണ്ടത്. ലൗ ജിഹാദ് കേസുകളില് ജുഡീഷ്യറിയുടെ ഇടപെടലാണ് വേണ്ടതെന്നും ജോര്ജ് കുര്യന് കൂട്ടിച്ചേര്ത്തു.
ബിജെപി എറണാകുളം ഈസ്റ്റ് ജില്ലാ പ്രസിഡന്റ് പി.പി. സജീവ്, ജില്ലാ ജന. സെക്രട്ടറിമാരായ ഇ.ടി. നടരാജന്, അഡ്വ. സൂരജ് ജോണ്, അരുണ് പി. മോഹന്, കോതമംഗലം മണ്ഡലം പ്രസിഡന്റ് സിന്ധു പ്രവീണ്, മണ്ഡലം ജന. സെക്രട്ടറി ഉണ്ണികൃഷ്ണന് മാങ്ങോട്, അനന്തു സജീവ് എന്നിവരും മന്ത്രിക്കൊപ്പമുണ്ടായിരുന്നു.
