തൃശൂര്‍ : സുരേഷ് ഗോപിയെ കുടുക്കാന്‍ പറ്റുന്ന ഷാര്‍പ്പായ ചോദ്യവുമായി എത്തിയതാണ് ന്യൂസ് 18 ചാനലിലെ മാധ്യമപ്രവര്‍ത്തകയായ പെണ്‍കുട്ടി. ശക്തവും വ്യക്തവുമായ ചോദ്യമായിരുന്നു ഈ പെണ്‍കുട്ടി ചോദിച്ചത്. “മാസ്സ് ഡയലോഗടിച്ച് മാധ്യമപ്രവര്‍ത്തകരെ മാറ്റി നിര്‍ത്തുന്ന സുരേഷ് ഗോപി…പക്ഷെ വോട്ട് മോഷണക്കേസ് വന്നപ്പോള്‍ ദല്‍ഹി മുതലുള്ള മാധ്യമപ്രവര്‍ത്തകര്‍ പറയുന്നത് അവരെ കണ്ടില്ലാ എന്ന് നടിച്ച് സുരേഷ് ഗോപി മൗനത്തോട് കൂടി പോകുകയാണ് എന്നാണ്…അദ്ദേഹത്തിന് ഒരു ഉത്തരവാദിത്വമുണ്ട്. സമൂഹത്തോട് ഒരു ഉത്തരവാദിത്വമുണ്ട. അങ്ങിനെ ആരോപണവിധേയന്റെ സ്ഥാനത്ത് നില്‍ക്കുമ്പോള്‍ എന്തെങ്കിലുമൊന്ന് മറുപടി പറയേണ്ടതല്ലേ….?”
യുവമാധ്യമപ്രവര്‍ത്തകയുടെ ഈ ചോദ്യത്തിന് ശോഭാ സുരേന്ദ്രന്‍ നല്കിയ ഉത്തരം ഇതാണ്:”ഞങ്ങളടെ അത്ര തൊലിക്കട്ടി ശ്രീമാന്‍ സുരേഷ് ഗോപിക്കായിട്ടില്ല. ഞങ്ങളൊക്കെ ഈ ഗ്രൗണ്ടില്‍ ഒരു പാട് വര്‍ഷങ്ങളായി കിടന്ന് കളിക്കുന്ന ആളുകളാണ്. അപ്പോള്‍ ഞങ്ങള്‍ക്ക് കുറച്ച് തൊലിക്കട്ടിയും കൂടുതലുണ്ട്. ഞങ്ങള്‍ക്ക് കുറെ കാര്യങ്ങള്‍ പറയാനും സാധിക്കും. എന്നാല്‍ ശ്രീമാന്‍ സുരേഷ് ഗോപി താങ്കളെപ്പോലെയുള്ള ഒരു പെണ്‍കുട്ടിയെ കാണുമ്പോള്‍ ഇഷ്ടം കൊണ്ട് , കൗതുകം കൊണ്ട്…തോളിലൊന്ന് കൈവെച്ചാല്‍ അദ്ദേഹത്തെ പീഡനക്കേസില്‍ അകത്തിടാന്‍ വേണ്ടി എത്ര വാര്‍ത്തകളാണ് കേരളത്തില്‍ പടച്ചുവിട്ടത്. അതും ചെയ്തത് മാധ്യമപ്രവര്‍ത്തകര്‍ തന്നെയല്ലേ?. സ്വന്തം മകളെപ്പോലെ കണ്ട ഒരു പെണ്‍കുട്ടിയുടെ ഭാഗത്ത് നിന്നുപോലും അദ്ദേഹത്തിനെതിരെ സ്ത്രീപീഢനക്കേസ് ഉണ്ടായി. കോഴിക്കോട് അങ്ങാടിയില്‍ ഒരു കള്ളനെപ്പോലെ, ചോദ്യം ചെയ്യാനും ജാമ്യമെടുക്കാനും വരേണ്ട ഒരു ഗതികേട് അദ്ദേഹത്തിനുണ്ടായി. അത്തരമൊരു അനുഭവം ശ്രീ സുരേഷ് ഗോപിക്ക് സമ്മാനിച്ചത് ചില മാധ്യമപ്രവര്‍ത്തകരല്ലേ?. അപ്പോ മാധ്യമപ്രവര്‍ത്തകര്‍ക്ക് ഇങ്ങോട്ട് ആത്മാര്‍ത്ഥതയില്ലെങ്കില്‍, കേന്ദ്രമന്ത്രിക്ക് എപ്പോഴും അങ്ങോട്ട് ആത്മാര്‍ത്ഥത വേണം എന്ന് പറഞ്ഞ് ഞങ്ങള്‍ക്ക് ആവശ്യപ്പെടാന്‍ പറ്റില്ല. “- ഇതോടെ ആ മാധ്യമപ്രവര്‍ത്തക കണ്ടം വഴി ഓടി.
