തിരുവനന്തപുരം: സംസ്ഥാനതല വോട്ടര് പട്ടികയില് വ്യാപക ക്രമക്കേടുകള് ഉണ്ടെന്ന് ചൂണ്ടിക്കാട്ടി ബി ജെ പി സംസ്ഥാന തെരഞ്ഞെടുപ്പ് കമ്മീഷണര്ക്ക് പരാതി നല്കി. ബി ജെ പി ദേശീയ നിര്വാഹക സമിതി അംഗം കുമ്മനം രാജശേഖരന്റെ നേതൃത്വത്തിലാണ് സംസ്ഥാന തെരഞ്ഞെടുപ്പ് കമ്മീഷണര് എ ഷാജഹാന് പരാതി നല്കിയത്.
ഓരോ വാര്ഡിലും എത്രത്തോളം വോട്ടര്മാര് ഉണ്ടെന്ന് നേരത്തേ രേഖപ്പെടുത്തിയിട്ടുളളതാണെന്ന് കുമ്മനം പറഞ്ഞു.എന്നാല് വോട്ടര് പട്ടിക പ്രസിദ്ധീകരിച്ചപ്പോള് വന് വര്ദ്ധനയാണ് കാണുന്നത്.ചില വാര്ഡുകളില് നേരത്തേ പറഞ്ഞതില് നിന്നും ഇരട്ടി വോട്ടര്മാരാണുളളത്.വിവിധ വാര്ഡുകളില് അവിശ്വസനീയമായ രീതിയിലാണ് വോട്ടര്മാരുടെ എണ്ണം വര്ദ്ധിച്ചിട്ടുളളതെന്ന് പരാതി നല്കിയ ശേഷം കുമ്മനം മാധ്യമങ്ങളോട് പറഞ്ഞു.
ഇതെങ്ങനെ സംഭവിച്ചു എന്ന് തെരഞ്ഞെടുപ്പ് കമ്മീഷന് പരിശോധിക്കണം. അന്വേഷണം നടത്തി പാകപ്പിഴയില്ലാത്ത വോട്ടര് പട്ടിക പ്രസിദ്ധീകരിക്കണമെന്നും കുമ്മനം ആവശ്യപ്പെട്ടു.ബി ജെ പി തിരുവനന്തപുരം സെന്ട്രല് ജില്ലാ പ്രസിഡന്റ് കരമന ജയന്, വി വി രാജേഷ്, ജെ ആര് പത്മകുമാര്, ഗിരി എന്നിവര് പരാതി നല്കാന് കുമ്മനത്തിനൊപ്പം ഉണ്ടായിരുന്നു.
