ന്യൂദല്ഹി : കെടിയു, ഡിജിറ്റല് സര്വകലാശാലകളില് സ്ഥിരം വിസിമാരെ കണ്ടെത്താനുള്ള സെര്ച്ച് കമ്മറ്റി സുപ്രീംകോടതി രൂപീകരിക്കും.നാല് പേര് വീതമുള്ള പാനലുകള് നല്കാന് സര്ക്കാരിനോടും ഗവര്ണറോടും സുപ്രീംകോടതി ആവശ്യപ്പെട്ടു.
സെര്ച്ച് കമ്മിറ്റി രൂപീകരണം സംബന്ധിച്ച് ഗവര്ണറും സംസ്ഥാന സര്ക്കാരും തമ്മിലുളള തര്ക്കം സ്ഥിരം വിസിമാരെ നിയമിക്കുന്നതില് പ്രതിസന്ധിയായിരിക്ക ആണ് സുപ്രീംകോടതിയുടെ ഇടപെടല്. ഇരുസര്വകലാശാലകള്ക്കും സമയബന്ധിതമായി വിസിമാരെ നിയമിക്കേണ്ടതുണ്ടെന്ന് കോടതി പറഞ്ഞു.
സര്വകലാശാല നിയമ പ്രകാരം പേരുകള് നിര്ദ്ദേശിക്കാന് സംസ്ഥാനത്തിനാണ് അധികാരമെന്ന് സര്ക്കാര് വാദിച്ചപ്പോള് യുജിസി നിയമം അനുസരിച്ചാണ് മുന്നോട്ട് പോകേണ്ടതെന്ന് ഗവര്ണര് വാദമുയര്ത്തി. ഇതോടെയാണ് തര്ക്കപരിഹാരം എന്ന നിലയില് കോടതി സെര്ച്ച് കമ്മറ്റി രൂപീകരിക്കാമെന്നു പറഞ്ഞത്.ഗവര്ണറും സംസ്ഥാന സര്ക്കാരും നാല് പേരുകള് വീതം കൈമാറണം.ഈ പാനലുകള് പരിശോധിച്ച് ഒരു യുജിസി പ്രതിനിധിക്കു പുറമെയുള്ളവരെ സുപ്രീംകോടതി നിശ്ചയിക്കും. വ്യാഴാഴ്ച കേസ് വീണ്ടും പരിഗണിക്കുമ്പോള് പേര് നല്കാനാണ് നിര്ദ്ദേശം.
ഏകപക്ഷീയമായി ഗവര്ണര് താല്കാലിക വിസിമാരെ നിയമിച്ചത് റദ്ദാക്കണമെന്ന് സംസ്ഥാനം വാദമുയര്ത്തിയെങ്കിലും ഇതിനെ ചൊല്ലിയുള്ള തര്ക്കം മുന്നോട്ട് കൊണ്ടുപോകേണ്ടതില്ലെന്ന് കോടതി പറഞ്ഞു. സര്ക്കാരും ഗവര്ണറും ചര്ച്ചയിലൂടെ പരിഹാരം കാണണമെന്ന് കോടതി വീണ്ടും ആഭ്യര്ത്ഥിച്ചു. കേസില് ഗവര്ണര്ക്കുവേണ്ടി അറ്റോര്ണി ജനറല് ആര്. വെങ്കിട്ടരമണി, മുതിര്ന്ന അഭിഭാഷകന് പി. ശ്രീകുമാര്, അഭിഭാഷകന് വെങ്കിട്ട സുബ്രമണ്യം ടി.ആര്. എന്നിവര് ഹാജരായി. സംസ്ഥാന സര്ക്കാരിനായി മുതിര്ന്ന അഭിഭാഷകന് ജയ്ദീപ് ഗുപ്ത, സ്റ്റാന്റിംഗ് കോണ്സല് സി.കെ. ശശി, അഭിഭാഷക മീന കെ. പൗലോസ് എന്നിവരും ഹാജരായി
