തിരുവനന്തപുരം: സ്പോര്ട്സ് കൗണ്സില് ആസ്ഥാനത്ത് കയ്യാങ്കളി.കഴിഞ്ഞ ദിവസം ഉച്ചയ്ക്കാണ് തമ്മില് തല്ലുണ്ടായത്.
മര്ദനമേറ്റ സംസ്ഥാന ജൂഡോ അസോസിയേഷന് ടെക്നിക്കല് സെക്രട്ടറി ജോയ് വര്ഗീസ് ആശുപത്രിയിലാണ്. ജൂഡോ അസോസിയേഷന് മുന് ജില്ലാ സെക്രട്ടറി സനോഫറാണ് മര്ദിച്ചത്.
തമ്മിലടിച്ച ഇവരെ അവിടെ ഉണ്ടായിരുന്ന മറ്റ് ജീവനക്കാര് എത്തിയാണ് പിടിച്ചുമാറ്റിയത്. ജോയ് വര്ഗീസ് മറ്റൊരു ജില്ലയില് നിന്നാണ് ഇന്നലെ തിരുവനന്തപുരത്ത് എത്തിയത്. മുന്വൈരാഗ്യമാണ് മര്ദന കാരണമെന്ന് ജോയ് വര്ഗീസ് പറഞ്ഞു. ജോയ് വര്ഗീസിന്റെ പരാതിയില് കന്റോണ്മെന്റ് പൊലീസ് കേസെടുത്തു.
എന്നാല് ജൂഡോ ചാമ്പ്യന്മാരായ തന്റെ രണ്ട് മക്കളെ തൃശൂരില് കഴിഞ്ഞ മാസം നടന്ന ജൂഡോ ചാമ്പ്യന്ഷിപ്പില് വച്ച് ജോയ് വര്ഗീസും അദ്ദേഹത്തിന്റെ ശിഷ്യന്മാരും ചേര്ന്ന് ഉപദ്രവിച്ചുവെന്നാണ് സനോഫര് പറയുന്നത്.ഇത് ചോദ്യം ചെയ്യാനാണ് ജോയ് വര്ഗീസിന്റെയടുത്ത് എത്തിയതെന്നും അതിനിടെ ജോയ് തന്റെ മുഖത്തടിച്ചുവെന്നും ഇയാള് പറയുന്നു. ഇതേ തുടര്ന്ന് താന് തിരിച്ച് അടിക്കുകയായിരുന്നു. സനോഫറിനെയും ആശുപത്രിയില് പ്രവേശിപ്പിച്ചെങ്കിലും പിന്നീട് ഇദ്ദേഹം ആശുപത്രി വിട്ടു.
