കോതമംഗലം: മുവാറ്റുപുഴ ഗവ. ടിടിഐ വിദ്യാര്ത്ഥിനി സോന എല്ദോസിനെ പാനായിക്കുളം സ്വദേശി റമീസ് നിര്ബന്ധിച്ച് മതം മാറ്റാന് ശ്രമിച്ചത് ലൗ ജിഹാദിലൂടെ. ആലുവ യുസി കോളജില് ബിഎ മലയാളത്തിന് പഠിക്കുന്ന കാലത്താണ് റമീസ് സോനയെ ലൗ ജിഹാദില് കുരുക്കിയത്.
റമീസും സോനയും ഒരേ ക്ലാസിലാണ് പഠിച്ചത്. കോളജ് പഠനം കഴിഞ്ഞ് സോന മൂവാറ്റുപുഴ ഗവണ്മെന്റ് ടിടിഐയില് ചേര്ന്നെങ്കിലും ബന്ധം തുടര്ന്നു. ബന്ധം മാതാപിതാക്കള് മുമ്പേ അറിഞ്ഞിരുന്നെങ്കിലും മകളുടെ സമ്മര്ദ്ദത്തിന് വഴങ്ങി വിവാഹത്തിന് ഇവര് സമ്മതിച്ചു. മുസ്ലീം മതത്തിലേക്ക് മാറണമെന്ന റമീസിന്റെ കുടുംബത്തിന്റെ ആവശ്യം സോന അംഗീകരിക്കുകയും ചെയ്തു.
എന്നാല് സോനയുടെ പിതാവ് എല്ദോസിന്റെ അപ്രതീക്ഷിത മരണം കുടുംബത്തെ തളര്ത്തി. എല്ദോസ് മരിച്ച് നാല്പ്പത് ദിവസം കഴിയും മുമ്പ് റമീസിന്റെ കുടുംബം വിവാഹം നടത്തണമെന്ന ആവശ്യവുമായി സോനയുടെ കുടുംബത്തെ സമീപിച്ചു. വിവാഹത്തിന് മുമ്പുതന്നെ പെണ്കുട്ടിയെ പൊന്നാനിയിലെത്തിച്ച് രണ്ട് മാസത്തെ മത പഠനം പൂര്ത്തിയാക്കി ഇസ്ലാം ആക്കിയ ശേഷം വിവാഹം നടത്താമെന്നായിരുന്നു റമീസിന്റെ വീട്ടുകാരുടെ ആവശ്യം.
പിതാവിന്റെ മരണാനന്തര കര്മങ്ങള് പൂര്ത്തിയാക്കി ഒരു വര്ഷം എങ്കിലും കഴിയാതെ മതംമാറാന് തയാറല്ലെന്ന് സോന നിലപാടെടുത്തതോടെ റമീസും കുടുംബവും സോനയുടെ കുടുംബത്തെ ഭീഷണിപ്പെടുത്താന് തുടങ്ങി. ഇതിനിടെ റമീസ് മറ്റൊരു പെണ്കുട്ടിയെ വലയിലാക്കാന് ശ്രമിക്കുന്നുണ്ടെന്ന് അറിഞ്ഞതോടെ സോന റമീസിന്റെയും കുടുംബത്തിന്റെയും മതം മാറണം എന്ന ആവശ്യത്തില് നിന്നും പിന്നോട്ടുപോയി. റമീസുമായുള്ള വിവാഹം രജിസ്റ്റര് ഓഫീസില് വച്ച് നടത്താം എന്ന് അറിയിച്ചു.
ഇതിനിടെ സോന അടിമാലിയില് താമസിക്കുന്ന കൂട്ടുകാരിയെ സന്ദര്ശിക്കാന് പോകുകയും അവിടെ വച്ച് റമീസുമായി രജിസ്റ്റര് വിവാഹം നടത്താമെന്ന് അറിയിക്കുകയും ചയ്തു. എന്നാല് വിവാഹം ആലുവയില് വച്ച് രജിസ്റ്റര് ചെയ്യാമെന്നും വീട്ടുകാരുടെ സമ്മതം ലഭിച്ചുവെന്നും പറഞ്ഞ് റമീസ് സോനയെ അടിമാലിയില് നിന്നും ആലുവയ്ക്ക് കൂട്ടികൊണ്ടുപോകുകയും ആലുവ പാനായിക്കുളത്തുള്ള വീട്ടിലെ മുറിയില് പൂട്ടിയിടുകയുമായിരുന്നു. അവിടെ നിന്നും ബലമായി പൊന്നാനിയില് കൊണ്ടുപോയി മതം മാറ്റാനാണ് വീട്ടുകാരുടെ പദ്ധതി എന്ന് മനസിലാക്കിയപ്പോള് ഈ വിവരം സോന അടിമാലിയിലെ സുഹൃത്തിനെ അറിയിച്ചു. സുഹൃത്തിനോട് സോനയുടെ സഹോദരനെ അറിയിക്കാനും ആവശ്യപ്പെട്ടു. സോനയും സുഹൃത്തും തമ്മിലുള്ള സംഭാഷണം റമീസിന്റെ വീട്ടുകാര് അറിഞ്ഞതോടെ റമീസും ചില ബന്ധുക്കളും ചേര്ന്ന് സോനയെ കോതമംഗലം കറുകടത്തുള്ള വീട്ടിലേക്ക് കൊണ്ടുവിടുകയായിരുന്നു. ഇത് കഴിഞ്ഞ് രണ്ട് ദിവസം പിന്നിട്ടപ്പോഴാണ് സോന ആത്മഹത്യ ചെയ്തത്.
