കണ്ണൂര്: തലശേരി ആര്ച്ച് ബിഷപ്പ് മാര് ജോസഫ് പാംപ്ലാനിയെ അധിക്ഷേപിച്ച് ഡിവൈഎഫ്ഐ നേതാവ്. ഹിറ്റ്ലറുടെ കടുത്ത അനുയായിരുന്ന നിയോ മുള്ളറുടെ അവസ്ഥയാണ് തലശേരി ആര്ച്ച് ബിഷപ്പിനെ കാത്തിരിക്കുന്നതെന്നാണ് സംസ്ഥാന സെക്രട്ടറി വി.കെ. സനോജ് പറഞ്ഞത്. സനോജിന്റെ പ്രസംഗത്തിനെതിരെ വിവിധ ക്രൈസ്തവ സംഘടനകള് ശക്തമായ പ്രതിഷേധവുമായി രംഗത്ത് വന്നു.
ചില പിതാക്കന്മാര് ആര്എസ്എസിന് കുഴലൂത്ത് നടത്തുകയാണ്. കേക്കുമായി ആര്എസ്എസ് ശാഖയിലേക്ക് ചിലര് പോകുന്നു. തിരിച്ച് ആര്എസ്എസ് ശാഖയില് നിന്നും കേക്കുമായി അരമനകളിലേക്കും വരുന്നു. പരസ്പരം പരവതാനി വിരിക്കുകയാണ്, എന്നായിരുന്നു സനോജിന്റെ ആരോപണം. പാംബ്ലാനിക്കെതിരെ ഡിവൈഎഫ്ഐ സംസ്ഥാന സെക്രട്ടറിയുടെ പ്രസ്താവന അപക്വവും തരംതാണതുമാണെന്ന് വിവിധ ക്രൈസ്തവ സംഘടനാ നേതാക്കള് പറഞ്ഞു.
ഹിറ്റ്ലറുടെ അനുയായി നിയോ മുള്ളറുടെ ഗതി മുഖ്യമന്ത്രി പിണറായി വിജയനെയും ഡിവൈഎഫ്ഐ സംസ്ഥാന സെക്രട്ടറി വി.കെ. സനോജിനെയും കാത്തിരിക്കുകയാണെന്ന് ബിജെപി കണ്ണൂര് നോര്ത്ത് ജില്ലാ പ്രസിഡന്റ് കെ.കെ. വിനോദ് കുമാര് പറഞ്ഞു.
എസ്ഡിപിഐയുടെയും ജമാഅത്തെ ഇസ്ലാമിയുടെയും മറ്റു രാജ്യവിരുദ്ധ ശക്തികളുടെയും കുഴലൂത്ത് നടത്തുന്നത് ഡിവൈഎഫ്ഐയും സിപിഎമ്മും ആണെന്ന് അദ്ദേഹം പറഞ്ഞു.
