ന്യൂദല്ഹി: പണ്ട് പൊഖ്റാനില് ഇന്ത്യ ആണവസ്ഫോടനം നടത്തിയപ്പോള് ലോകം മുഴുവന് ഇന്ത്യയ്ക്കെതിരെ ഉപരോധം ഏര്പ്പെടുത്തി. അന്ന് മോദിയുടെ ഗുരുവായ വാജ് പേയിയായിരുന്നു പ്രധാനമന്ത്രി. അദ്ദേഹം ആ പ്രതിസന്ധിയെ അതിജീവിച്ചു. അതുപോലെ ശിഷ്യനായ മോദിയും ഇപ്പോള് ട്രംപ് ഉയര്ത്തുന്ന വ്യാപാരച്ചുങ്ക ഭീഷണിയെ അതിജീവിക്കുമെന്ന് ഉറപ്പുണ്ടെന്ന് സാമ്പത്തിക, രാഷ്ട്രീയ നിരീക്ഷികര്. അത്യധികം അതിജീവനശേഷിയുള്ള ഇന്ത്യയുടെ സമ്പദ് വ്യവസ്ഥ ഇപ്പോള് യുഎസ് പ്രസിഡന്റ് ട്രംപ് ഏര്പ്പെടുത്തിയ വ്യാപാരഭീഷണിയെയും അതിജീവിക്കുമെന്ന് വിദഗ്ധര്. ട്രംപ് ഇന്ത്യയ്ക്കെതിരെ ഏര്പ്പെടുത്തിയ 50 ശതമാനം അധിക വ്യാപാരതീരുവ ബാധിക്കുന്നത് ഏതാനും ഉല്പന്നങ്ങളെ മാത്രമാണ്.
ടെക്സ്റ്റൈല്, ലെതര് ഉല്പന്നങ്ങള്, ചെമ്മീന് എന്നിവയുടെ മേല് ആണ് ട്രംപ് 50 ശതമാനം അധിക വ്യാപാരത്തീരുവ ആഗസ്ത് 27 മുതല് ഏര്പ്പെടുത്തുക. ഈ മൂന്ന് വിഭാഗത്തില്പ്പെട്ട ഉല്പന്നങ്ങള് ഇന്ത്യയുടെ ആകെ കയറ്റുമതിയുടെ 40 മുതല് 50 ശതമാനം വരെ വരും. ഇന്ത്യയുടെ ആകെ കയറ്റുമതി കഴിഞ്ഞ വര്ഷം 8500 കോടി എന്ന് കണക്കാക്കിയാല് ഇതിന്റെ നേര്പകുതിയായ 4500 കോടി ഡോളറിന്റെ കയറ്റുമതിയെയാണ് അത് ബാധിക്കുക അതേ സമയം മരുന്ന്, ഇലക്ട്രോണിക് ഉല്പന്നങ്ങള്, മൊബൈല് ഫോണ് എന്നിവയുടെ മേല് ട്രംപ് അധികതീരുവ ചുമത്തിയിട്ടില്ല.
ടെക്സ്റ്റൈല്, ലെതര് ഉല്പന്നങ്ങള്, ചെമ്മീന് എന്നീ ഉല്പന്നങ്ങളുടെ മേല് ഏര്പ്പെടുത്തിയ 50 ശതമാനം അധിക തീരുവമൂലം 4500 കോടി ഡോളര് പൂര്ണ്ണമായും ഇന്ത്യയ്ക്ക് നഷ്ടമാകുന്നു എന്ന് കണക്കാക്കിയാല് പോലും അത് ഇന്ത്യയുടെ മൊത്തം ദേശീയവരുമാനത്തിന്റെ ഒരു ശതമാനം മാത്രമേ വരൂ. കാരണം ഇന്ത്യയുടെ ഇപ്പോഴത്തെ ദേശീയ വരുമാനം (ജിഡിപി) 4 ലക്ഷം ഡോളര് (4000 ബില്യണ് ഡോളര്) ആണ്. അതായത് ട്രംപ് അധിക തീരുവ ഏര്പ്പെടുത്തുന്നത് മൂലം നഷ്ടമാവുന്ന 4500 കോടി ഡോളര് എന്നത് നമ്മുടെ മൊത്തം ദേശീയവരുമാനത്തിന്റെ ഒരു ശതമാനം മാത്രമേയുള്ളൂ എന്നര്ത്ഥം. ഈ വരുമാനം തള്ളിക്കളഞ്ഞാല്പോലും ഇന്ത്യയ്ക്ക് ആത്മാഭിമാനത്തോടെ തലയുയര്ത്തി നില്ക്കാന് സാധിക്കും.
ചരിത്രത്തില് പല കുറി ഇന്ത്യയുടെ സമ്പദ് വ്യവസ്ഥ മികച്ച അതിജീവനശേഷി പ്രകടിപ്പിച്ചിട്ടുണ്ട്. ജനങ്ങള്ക്കും കമ്പനികള്ക്കും രാഷ്ട്രീയ നേതൃത്വത്തിനും ഇത്തരം പ്രതിസന്ധികളെ അതിജീവിക്കാന് ശേഷിയുണ്ട്.
അത്തരം ഒരു പ്രതിസന്ധിയായിരുന്നു 1998ല് വാജ് പേയി സര്ക്കാരിന്റെ കാലത്ത് പൊഖ് റാനില് ആണവസ്ഫോടനം നടത്തിയതിനെ തുടര്ന്ന് സംജാതമായത്. യൂറോപ്യന് രാജ്യങ്ങള്, യുഎസ്, ജപ്പാന് എന്നിവയെല്ലാം ഇന്ത്യയ്ക്ക് മേല് അന്ന് ഉപരോധം ഏര്പ്പെടുത്തി. ഇതിനെ നേരിടുന്നതിന് വേണ്ടി പണം സമാഹരിക്കാന് വാജ് പേയി സര്ക്കാര് റീസര്ജന്റ്സ് ഇന്ത്യ ബോണ്ട് (പുനരുജ്ജീവനത്തിന്റെ ഇന്ത്യ ബോണ്ട്) കൊണ്ടുവന്നു. ഇന്ത്യയ്ക്ക് പുറത്ത് ജോലി ചെയ്യുന്ന ഇന്ത്യയെ നെഞ്ചേറ്റിയ വിദേശ ഇന്ത്യക്കാര് ഈ ബോണ്ടിനെ രണ്ട് കയ്യും നീട്ടി സ്വീകരിച്ചു. അന്ന് മുഴുവന് ബോണ്ടുകളും വിറ്റ് ഇന്ത്യ പണം സമാഹരിച്ചു. ഇതിലൂടെ നമ്മള് ഉപരോധത്തെ അതിജീവിക്കുകയായിരുന്നു.
