ന്യൂദല്‍ഹി: ലോകത്തിലെ ഏറ്റവും വലിയ അഞ്ചാമത്തെ വ്യോമയാന വിപണിയായി ഭാരതം. പ്രതിവര്‍ഷം 24 കോടിയിലധികം യാത്രികരാണ് ആകാശമാര്‍ഗം യാത്ര ചെയ്യുന്നത്. 2024 ലെ ഏറ്റവും തിരക്കുപിടിച്ച വ്യോമയാനപാതകളില്‍ ഒന്നാണ് മുംബൈ-ദല്‍ഹി
പാത. 59 ലക്ഷം യാത്രക്കാരാണ് ഈ പാത ഉപയോഗപ്പെടുത്തിയത്. ഏകദേശം 350 എയര്‍ലൈനുകളെ പ്രതിനിധീകരിക്കുന്ന ഇന്റര്‍നാഷണല്‍ എയര്‍ ട്രാന്‍സ്‌പോര്‍ട്ട് അസോസിയേഷന്റെ (ഐഎടിഎ) പുറത്തിറക്കിയ റിപ്പോര്‍ട്ടിലാണ് ഇക്കാര്യം വ്യക്തമാക്കുന്നത്.
കഴിഞ്ഞ വര്‍ഷം രാജ്യത്ത് 211 ദശലക്ഷം വിമാന യാത്രക്കാര്‍ ഉണ്ടായിരുന്നു. മുന്‍വര്‍ഷത്തെ അപേക്ഷിച്ച് 11.1 ശതമാനം യാത്രക്കാരുടെ വര്‍ധനവാണ് രാജ്യത്ത് ഉണ്ടായത്. 87.6 കോടി യാത്രികര്‍ക്ക് സേവനം നല്കിയ യുഎസ് ആണ് ലോകത്തിലെ ഏറ്റവും വലിയ വ്യോമയാന വിപണി. ഓരോ രാജ്യത്തും എത്തുന്നതോ, അവിടെ നിന്ന് യാത്ര തിരിക്കുന്നതോ ആയ എല്ലാ യാത്രക്കാരും ഉള്‍പ്പെടുന്നതാണ് ഈ കണക്കുകള്‍. 741 ദശലക്ഷം യാത്രക്കാരുമായി ചൈനയാണ് രണ്ടാം സ്ഥാനത്ത്. യുകെ മൂന്നാം സ്ഥാനത്തും (261 ദശലക്ഷം യാത്രക്കാര്‍) സ്പെയിന്‍ നാലാം സ്ഥാനത്തും (241 ദശലക്ഷം) ആണെന്ന് കണക്ക് വ്യക്തമാക്കുന്നു.
