ന്യൂദല്ഹി: ഓപ്പറേഷന് സിന്ദൂര്, ഓപ്പറേഷന് മഹാദേവ് വിജയത്തെ അഭിനന്ദിച്ച് എന്ഡിഎ പാര്ലമെന്ററി പാര്ട്ടി യോഗം പ്രമേയം പാസാക്കി ഓപ്പറേഷന് സിന്ദൂറിന്റെ വിജയത്തില് എംപിമാര് പ്രധാനമന്ത്രി നരേന്ദ്രമോദിയെ പ്രശംസിച്ചു. ഉത്തരവാദിത്വമില്ലാത്ത പ്രസ്താവനകള് നടത്തുന്നതില് പ്രതിപക്ഷനേതാവ് രാഹുലിനെ യോഗം വിമര്ശിച്ചു. ഏറ്റവും കൂടുതല് കാലം രാജ്യത്തിന്റെ ആഭ്യന്തരമന്ത്രിയായി പ്രവര്ത്തിക്കുന്ന അമിത്ഷായെ പ്രധാനമന്ത്രി അഭിനന്ദിച്ചു.
പാര്ലമെന്റിന്റെ ലൈബ്രറി ഹാളില് ചേര്ന്ന എന്ഡിഎ പാര്ലമെന്ററി പാര്ട്ടി യോഗത്തില് ലോക്സഭയിലെയും രാജ്യസഭയിലെയും എന്ഡിഎ എംപിമാര് പങ്കെടുത്തു. ഭീകരതക്ക് കനത്ത പ്രഹരം ഏല്പ്പിച്ച ഓപ്പറേഷന് സിന്ദൂര്, ഓപ്പറേഷന് മഹാദേവിന്റെയും വിജയത്തില് ഏകകണ്ഠമായി പ്രമേയം പാസാക്കി. സായുധ സേനയുടെ സമാനതകളില്ലാത്ത ധൈര്യവും പ്രതിബദ്ധതയുമാണ് രാജ്യത്തെ സുരക്ഷിതമാക്കുന്നതെന്ന് പ്രമേയം വ്യക്തമാക്കി. പഹല്ഗാമില് കൊല്ലപ്പെട്ടവരുടെ കുടുംബങ്ങള്ക്ക് അനുശോചനം അറിയിച്ചു.
