ന്യൂദല്ഹി: പ്രതിരോധരംഗമടക്കം തന്ത്ര പ്രധാന മേഖലകളില് സഹകരണം ശക്തമാക്കാന് ഭാരതവും ഫിലിപ്പീന്സും ധാരണയിലെത്തി. ഭാരതം സന്ദര്ശിക്കുന്ന ഫിലിപ്പീന്സ് പ്രസിഡന്റ് ഫെര്ഡിനാന്ഡ് ആര് മാര്ക്കോസ് ജൂനിയറും പ്രധാനമന്ത്രി നരേന്ദ്രമോദിയും തമ്മിലുള്ള ചര്ച്ചയിലാണ് ഇക്കാര്യത്തില് ധാരണയിലെത്തിയത്.
ഇന്നലെ ന്യൂദല്ഹിയില് ഫെര്ഡിനാന്ഡ് ആര്. മാര്ക്കോസ് ജൂനിയറിനും ഭാര്യ ലൂയിസ് അരനെറ്റ മാര്ക്കോസിനും രാഷ്ട്രപതി ദ്രൗപദി മുര്മുവും പ്രധാനമന്ത്രി നരേന്ദ്രമോദിയും ഔദ്യോഗിക സ്വീകരണം നല്കി. മോദിയും മാര്ക്കോസും ഉഭയകക്ഷി ചര്ച്ചയ്ക്ക് ശേഷം തന്ത്രപ്രധാന പങ്കാളിത്തം സംബന്ധിച്ച് പ്രഖ്യാപനം നടത്തി.
ക്രിമിനല് കാര്യങ്ങളിലെ പരസ്പര നിയമ സഹായം, ജയില്ശിക്ഷ അനുഭവിക്കുന്നവരുടെ കൈമാറ്റം, ശാസ്ത്ര സാങ്കേതികം, ടൂറിസം, ഡിജിറ്റല് സാങ്കേതികവിദ്യ, ബഹിരാകാശം തുടങ്ങിയ മേഖലകളിലെ സഹകരണം സംബന്ധിച്ച കരാറുകളില് ഒപ്പിട്ടു.
ഫിലിപ്പീന്സ് പൗരന്മാര്ക്കുള്ള സൗജന്യ ഇ-ടൂറിസ്റ്റ് വിസ സൗകര്യം ഒരു വര്ഷത്തേക്കു കൂട്ടി നീട്ടിയതായും പ്രധാനമന്ത്രി അറിയിച്ചു. ഭാരത-ഫിലിപ്പീന്സ് നയതന്ത്ര ബന്ധങ്ങള് സ്ഥാപിച്ചതിന്റെ 75-ാം വാര്ഷികം ആഘോഷിക്കുന്നതിനായി സംയുക്തമായി സ്റ്റാമ്പ് പുറത്തിറക്കാനും തീരുമാനിച്ചു.
നരേന്ദ്രമോദിയുടെ ക്ഷണപ്രകാരമാണ് പ്രസിഡന്റ് മാര്ക്കോസിന്റെ സന്ദര്ശനം.
