തിരുവനന്തപുരം: നടന് കുഞ്ചാക്കോ ബോബനെ സ്കൂള് ഉച്ചഭക്ഷണത്തിന് ക്ഷണിച്ച് മന്ത്രി വി ശിവന്കുട്ടി. മികച്ച ഭക്ഷണം ജയിലിലല്ല സ്കൂള് കുട്ടികള്ക്കാണ് നല്കേണ്ടതെന്ന് തൃക്കാക്കര മണ്ഡലത്തിലെ സ്കൂള് കുട്ടികള്ക്കായി ഉമാ തോമസ് എംഎല്എ തുടങ്ങിയ പ്രഭാതഭക്ഷണ പദ്ധതി ഉദ്ഘാടനം ചെയ്തുകൊണ്ട് നടന് പറഞ്ഞിരുന്നു. ഇതു സംബന്ധിച്ച മാധ്യമ വാര്ത്തകള് ശ്രദ്ധയില് പെട്ടതോടെയാണ് മന്ത്രിയുടെ ഫേസ്ബുക്ക് കുറിപ്പ്.
‘മികച്ച ഭക്ഷണം നല്കേണ്ടത് ജയിലിലല്ല, സ്കൂള് കുട്ടികള്ക്കാണ്’- കുഞ്ചാക്കോ ബോബന്’
ഈ രൂപത്തിലുള്ള ഗ്രാഫിക്സ് കാര്ഡുകള് ആണ് ആദ്യം ശ്രദ്ധയില്പ്പെട്ടത്. എന്താണ് ചാക്കോച്ചന് പറഞ്ഞത് എന്നറിയണമല്ലോ. ആ വാക്കുകള് ഞാന് കേട്ടു. ചാക്കോച്ചന് സദുദ്ദേശത്തോടെ പറഞ്ഞ കാര്യം ഇങ്ങിനെയാണ് റിപ്പോര്ട്ട് ചെയ്യപ്പെട്ടത് എന്നാണ് മനസ്സിലാക്കുന്നത്. എന്തായാലും ഒരു സര്ക്കാര് സ്കൂളില് ഉച്ചഭക്ഷണ സമയത്ത് സന്ദര്ശനം നടത്താന് ചാക്കോച്ചനെ സ്നേഹപൂര്വ്വം ക്ഷണിക്കുന്നു. ഞാനും വരാം. കുട്ടികള്ക്കും സന്തോഷമാവും.
കുഞ്ഞുങ്ങള്ക്കൊപ്പം ഭക്ഷണവും കഴിക്കാം. സ്കൂള് ഉച്ചഭക്ഷണത്തിന്റെ മെനുവും രുചിയും അറിയുകയും ചെയ്യാം’. എന്നാണ് ഫേസ് ബുക്ക് കുറിപ്പ്.
എന്നാല് കഴിഞ്ഞദിവസം ഇടപ്പള്ളി ബി.ടി.എസ്.എല്.പി സ്കൂള് കുട്ടികള്ക്കും ഉമാ തോമസ് എംഎല്എയ്ക്കും ഒപ്പം നടന് ഭക്ഷണം കഴിച്ച കാര്യം മന്ത്രി അറിയാതെ പോയി.
