ന്യൂദല്ഹി:സ്വാതന്ത്ര്യദിനാഘോഷത്തിന് ഏതാനും ദിവസങ്ങള് മാത്രം ബാക്കിനില്ക്കെ പ്രധാനമന്ത്രി മോദി പ്രസംഗിക്കുന്ന ചെങ്കോട്ടയില് എന്തിനാണ് അഞ്ച് ബംഗ്ലാദേശികള് എത്തിയത് എന്ന വസ്തുത ആശങ്കയുണര്ത്തുന്നു. ഇവര് മൂന്ന് നാല് മാസങ്ങള്ക്ക് മുന്പ് ഇന്ത്യയില് എത്തിയെന്നും ദല്ഹിയില് കൂലിപ്പണി ചെയ്യുകയായിരുന്നുവെന്ന അവകാശവാദവും ഇവരുടെ ചെങ്കോട്ട സന്ദര്ശനവും തമ്മില് പൊരുത്തപ്പെടുന്നില്ല. ഇവരെ വിശദമായ ചോദ്യം ചെയ്യലിന് ശേഷം നാടുകടത്തും.
ഇവരെ ഇഡി, എന്ഐഎ തുടങ്ങിയ വിവിധ രഹസ്യ ഏജന്സികള് ചോദ്യം ചെയ്ത് തുടങ്ങി. ചെങ്കോട്ടയിലേക്ക് ബലമായി കയറാന് ശ്രമിച്ച ഇവരെ പൊലീസ് തടഞ്ഞ് നിര്ത്തി ചോദ്യം ചെയ്തപ്പോള് അവര് ഇന്ത്യന് തിരിച്ചറിയല് കാര്ഡ് കാണിച്ചുവെങ്കിലും സംശയം തോന്നി. പൊലീസ് വിശദമായി പരിശോധിച്ചപ്പോള് അത് വ്യാജമാണെന്ന് കണ്ടെത്തി. പിന്നീട് പൊലീസ് ശക്തമായി ചോദ്യം ചെയ്തപ്പോഴാണ് തങ്ങള് ബംഗ്ലാദേശികളാണെന്ന വിവരം ഈ അഞ്ചു പേരും വെളിപ്പെടുത്തിയത്. അവരുടെ ബംഗ്ലാദേശി പൗരത്വം സംബന്ധിച്ച വിശദാംശങ്ങള് മൊബൈല് ഫോണില് നിന്നും കണ്ടെടുത്തു. ബംഗ്ലാദേശിലുള്ള അവരുടെ ബന്ധുക്കളെയും തിരിച്ചറിഞ്ഞു.
നിയമപരമായ രേഖകള് ഇല്ലാതെയാണ് ഇവര് ഇന്ത്യയില് തങ്ങുന്നത്. ഇവര് എന്തിന് ചെങ്കോട്ട സന്ദര്ശിച്ചു എന്നതാണ് തലവേദനയായിരിക്കുന്നത്. ജൂലായ് 15 മുതല് ചെങ്കോട്ട അടച്ചിട്ടിരിക്കുകയാണെന്നതിനാല് ഇവര്ക്ക് ഉള്ളില് കടക്കാനായില്ല. പൊലീസ് ഇവിടെ നടത്തിയ മോക് ഡ്രില്ലില് ആണ് ബംഗ്ലാദേശി യുവാക്കളെ പിടികൂടിയത്.
