തിരുവനന്തപുരം: യെമന് സ്വദേശി തലാല് അബ്ദു മഹ്ദിയുടെ കൊലപാതകത്തില് വധശിക്ഷയ്ക്ക് വിധിക്കപ്പെട്ട മലയാളി നഴ്സ് നിമിഷ പ്രിയ വിഷയത്തില് ചാണ്ടി ഉമ്മന്, ഗവര്ണര് രാജേന്ദ്ര വിശ്വനാഥ ആര്ലേക്കറെ വീണ്ടും സന്ദര്ശിച്ചു. കേസ് സംബന്ധിച്ച
അവകാശവാദങ്ങളും കള്ള പ്രചാരണങ്ങളും വ്യാപകമായ പശ്ചാത്തലത്തിലായിരുന്നു കൂടിക്കാഴ്ച.
ജൂലൈ 16ന് നടക്കാനിരുന്ന നിമിഷ പ്രിയയുടെ വധശിക്ഷ ഇന്ത്യന് നയതന്ത്ര ഇടപെടലുകളെ തുടര്ന്ന് നീട്ടിവെച്ചിരുന്നു. ഗവര്ണറുടെ ഇടപെടല് ഇക്കാര്യത്തില് നിര്ണ്ണായകമായിരുന്നു. ചാണ്ടി ഉമ്മന് അമ്മ മറിയാമ്മ ഉമ്മനൊപ്പം വന്നു ഗവര്ണറെ കാണുകയും വിഷത്തില് സഹായിക്കണമെന്ന് അഭ്യര്ത്ഥിക്കുകയും ചെയ്തിരുന്നു. തുടര്ന്നാണ് ഗവര്ണറുടെ ഇടപെടല് ഉണ്ടായത്. ചാണ്ടി ഉമ്മന് പിന്നീട് നിമിഷയുടെ ഭര്ത്താവുമായി ഗവര്ണറെ സന്ദര്ശിക്കുകയും അമ്മയുമായി നേരിട്ട് സംസാരിക്കാന് അവസരം ഒരുക്കുകയും ചെയ്തിരുന്നു.
കാര്യങ്ങള് ലക്ഷ്യം നേടുന്ന തരത്തിലാണ് മുന്നോട്ടു പോകുന്നതെന്ന് ചാണ്ടി ഉമ്മന് ഗവര്ണറോട് പറഞ്ഞു. വിദേശകാര്യമന്ത്രാലയം സാധ്യമായ എല്ലാ പിന്തുണയും നല്കുന്നുണ്ട്. ചാണ്ടി പറഞ്ഞു.
വധശിക്ഷ നീട്ടിവെച്ചതിനെ തുടര്ന്ന് അതിന്റെ അവകാശവാദവുമായി പലരും രംഗത്തു വന്നിരുന്നു. സാമൂഹ്യമാധ്യമങ്ങളില് വ്യാപകമായി വന്ന വാര്ത്തകള് നിമിഷയുടെ മോചനത്തിനായുളള പ്രവര്ത്തനങ്ങളെ ദോഷകരമായും ബാധിച്ചിരുന്നു.
യെമനില് ഔദ്യോഗിക നയതന്ത്ര സാന്നിധ്യമില്ലാത്തതിനാല്, ഇന്ത്യ മൂന്നാം കക്ഷി സഖ്യകക്ഷികളിലൂടെ അനുരഞ്ജന ചര്ച്ചകള്ക്ക് ശ്രമിക്കുകയാണ്. ഇസ്ലാക നിയമപ്രകാരം, ദയാധനം (ബ്ലഡ് മണി) നല്കി പ്രതിക്ക് മാപ്പ് നല്കാന് കുടുംബത്തിന് അവസരമുണ്ട്. എന്നാല് തലാലിന്റെ കുടുംബം ഇതുവരെ ഈ നിര്ദ്ദേശം ശക്തമായി നിരസിക്കുകയാണ്.
ഇതിനിടെ നിമിഷയെ ഉടന് തൂക്കിലേറ്റണമെന്ന് ആവശ്യപ്പെട്ട് സഹോദരന് അബ്ദുല് ഫത്താഹ് മഹ്ദി വീണ്ടും രംഗത്ത്. യെമന് അറ്റോര്ണി ജനറല് ജഡ്ജി അബ്ദുല് സലാം അല് ഹൂതിക്കാണ് ജൂലൈ 30ന് അയച്ച കത്തില് അബ്ദുല് ഫത്താഹ് ഈ ആവശ്യം ഉന്നയിച്ചത്.
പാലക്കാട് സ്വദേശിനിയായ നിമിഷ പ്രിയ 37 വയസ്സുള്ള നഴ്സാണ്. 2008ല് യെമനിലേക്ക് പോയ നിമിഷ പിന്നീട് സ്വന്തമായി ഒരു ക്ലിനിക്ക് ആരംഭിച്ചു. 2017ല് അവരുടെ പാസ്പോര്ട്ട് കൈവശം വച്ചിരുന്ന ബിസിനസ് പങ്കാളി തലാല് അബ്ദു മഹ്ദിയെ പാസ്പോര്ട്ട് തിരികെ വാങ്ങാനായി ലഹരിമരുന്ന് കുത്തിവച്ച് കീഴ്പ്പെടുത്താന് ശ്രമിക്കുന്നതിനിടെയാണ് മരണം സംഭവിച്ചത്. തലാലിന്റെ മൃതദേഹം ഒരു വാട്ടര് ടാങ്കിനുള്ളില് ഒളിപ്പിച്ച നിലയില് കണ്ടെത്തുകയായിരുന്നു. ഈ സംഭവത്തെത്തുടര്ന്നാണ് നിമിഷ അറസ്റ്റിലായത്.
