കൊല്ലം: സംസ്ഥാനത്ത് ആദ്യമായി തീരസുരക്ഷയ്‌ക്ക് കടലോരജാഗ്രത സമിതിയുടെ ജില്ലാതല കമ്മറ്റി രൂപീകരിച്ച് പോലീസ് സേന. വിശാലമായ തീരദേശവും അന്തര്‍ദേശീയ കപ്പല്‍ചാനലിന്റെ സാന്നിദ്ധ്യവും തീരസുരക്ഷയ്‌ക്ക് ഭീഷണി ഉയര്‍ത്തുന്ന സാഹചര്യത്തില്‍ തീരദേശവാസികളുമായി ചേര്‍ന്ന് തീരസുരക്ഷയിലൂടെ രാജ്യസുരക്ഷ ഉറപ്പാക്കുക എന്ന ലക്ഷ്യത്തോടെയാണ് കൊല്ലംസിറ്റി പോലീസ് കടലോര ജാഗ്രതാസമിതി ജില്ലാതലയോഗം സംഘടിപ്പിച്ചത്.
സംസ്ഥാന തലത്തില്‍ ആദ്യമായി കൊല്ലം സിറ്റിയിലാണ് ജില്ലാതലരൂപീകരണം. ജില്ലാ പോലീസ് മേധാവി കിരണ്‍നാരായണിന്റെ അധ്യക്ഷതയിലായിരുന്നു ആദ്യയോഗം. കടലോര ജാഗ്രത സമിതിയുടെ പ്രാധാന്യവും തീരസുരക്ഷയില്‍ വഹിക്കേണ്ട പങ്കും വിശദീകരിച്ചു.
സ്‌പെഷല്‍ബ്രാഞ്ച് എസിപി എ. പ്രദീപ്കുമാര്‍ വിഷയാവതരണം നടത്തി. ചര്‍ച്ച അഡീഷണല്‍ എസ്പി സക്കറിയ മാത്യു നയിച്ചു. തീരപ്രദേശത്തെ വിവിധ വിഭാഗങ്ങളെ പ്രതിനിധീകരിച്ച പ്രതിനിധികള്‍ അവരുടെ പ്രശ്‌നങ്ങളും പരിമിതികളും ആശങ്കകളും യോഗത്തില്‍ പങ്കുവച്ചു. ചര്‍ച്ചയില്‍ തീരസുരക്ഷയുമായി ബന്ധപ്പെട്ട പ്രശ്‌നങ്ങളില്‍ പോലീസുമായി യോജിച്ച് പ്രവര്‍ത്തിക്കുമെന്നും കടലിലും തീരത്തുമുണ്ടാകുന്ന പ്രശ്‌നങ്ങള്‍ പോലീസിന്റെ അടിയന്തര ശ്രദ്ധയില്‍ കൊണ്ടുവരുമെന്നും പ്രതിനിധികള്‍ ഉറപ്പ് നല്‍കി.
ജാഗ്രതാസമിതി ജില്ലാ പ്രതിനിധികളായ ഫ്രാന്‍സീസ് സേവ്യര്‍, ബാഹുലേയന്‍, ജോണ്‍തോമസ്, എസിപിമാരായ നസീര്‍.എ, എസ്. ഷരീഫ്, അലക്‌സാണ്ടര്‍ തങ്കച്ചന്‍, തീരദേശ സ്റ്റേഷനുകളിലെ എസ്എച്ച്ഒമാര്‍ എന്നിവരും സംബന്ധിച്ചു.
