ഇസ്ലാമബാദ് : പാകിസ്ഥാനില് വലിയ എണ്ണശേഖരമുണ്ടെന്നും ഭാവിയില് ഇന്ത്യയ്ക്ക് വേണമെങ്കില് അത് വില്ക്കാമെന്നുമുള്ള ട്രംപിന്റെ പെരുംനുണയെ പരിഹസിച്ച് ശശി തരൂര് എംപി. അമേരിക്കക്കാര് ചിലപ്പോള് ദിവാസ്വപ്നത്തിലായിരിക്കാമെന്നായിരുന്നു ശശി തരൂരിന്റെ പരിഹാസം.
“പാകിസ്ഥാനില് എണ്ണയുണ്ടെന്ന രീതിയില് വല്ല ദിവാസ്വപ്നവും ട്രംപിന് ഉണ്ടായിക്കാണാം. പണ്ട് ഒരു രാജ്യമായിരുന്നു ഇന്ത്യയും പാകിസ്ഥാനും. പക്ഷെ പാകിസ്ഥാന്റെ ഭൂപ്രദേശത്ത് എവിടെയെങ്കിലും വന്തോതില് എണ്ണശേഖരമുണ്ടെന്ന് എവിടെയും റിപ്പോര്ട്ട് ചെയ്തിട്ടില്ല.”- ശശി തരൂര് വ്യക്തമാക്കി.
യാഥാര്ത്ഥ്യം ഇതായിരിക്കെയാണ്, പാകിസ്ഥാനുമായി എണ്ണ പര്യവേക്ഷണത്തിന്റെ കാര്യത്തില് അമേരിക്ക കരാറുണ്ടാക്കിയെന്നും പാകിസ്ഥാനിലെ വന് എണ്ണ ശേഖരം കുഴിച്ചെടുക്കുമെന്നും ഉള്ള അവകാശവാദവുമായി ട്രംപ് കഴിഞ്ഞ ദിവസം രംഗത്തെത്തിയിരുന്നു. ഇത് കുഴിച്ചെടുക്കാനുള്ള പ്രധാന എണ്ണക്കമ്പനി നിശ്ചയിച്ച് വരികയാണെന്നും ചിലപ്പോള് അവര് ഇന്ത്യയ്ക്ക് തന്നെ ഈ എണ്ണ വിറ്റുകൂടെന്നില്ലെന്നും ട്രംപ് പ്രസ്താവിച്ചിരുന്നു. ഇന്ത്യയുമായി വര്ധിച്ചുവരുന്ന അഭിപ്രായഭിന്നതയുടെ ഭാഗമായി ഇന്ത്യയെ പ്രകോപിപ്പിക്കുകയായിരുന്നു ട്രംപിന്റെ ഈ പ്രസ്താവനയ്ക്ക് പിന്നിലെ ലക്ഷ്യമെന്ന് ചിലര് വിലയിരുത്തിയിരുന്നു. കാരണം പാകിസ്ഥാനില് വന്തോതിലുള്ള എണ്ണ ശേഖരമില്ലെന്ന് ഈ രംഗത്തെ വിദഗ്ധര് പറയുന്നു. പിന്നെങ്ങിനെയാണ് അത് കുഴിച്ചെടുക്കുക എന്നതാണ് പലരും ഉയര്ത്തുന്ന ചോദ്യം.
ശരി നമുക്ക് നോക്കാം. ഇക്കാര്യത്തില് ട്രംപിന് എല്ലാം ഭാവുകങ്ങളും നേരുന്നുവെന്നും ശശി തരൂര് പരിഹസിച്ചു.
“മറ്റ് രാജ്യങ്ങളില് അവര് ആഗ്രഹിക്കുന്ന എന്തും അവര് ചെയ്തോട്ടെ. പക്ഷെ നമ്മുടെ രാജ്യത്തില് എന്താണ് അമേരിക്ക ചെയ്യാന് പോകുന്നത് എന്നതില് മാത്രമാണ് എനിക്ക് പ്രശ്നമുള്ളൂ”. -ശശി തരൂര് പറഞ്ഞു.
ഇത് ഒരു ചരിത്രപരമായ കരാര് ആണെന്നും ഇസ്ലാമബാദും വാഷിംഗ്ടണും തമ്മിലുള്ള ബന്ധം ആഴത്തിലുള്ളതാക്കാന് ഇത് സഹായിക്കുമെന്നും പാകിസ്ഥാന് പ്രധാനമന്ത്രി ഷെഹ്ബാസ് ഷെരീഫ് പറഞ്ഞിരുന്നു.
