കൊല്ലം: കമ്യൂണിസ്റ്റ് മൂല്യങ്ങള് നഷ്ടപ്പെടുത്തിയിട്ടുള്ള ഒരു പരിപാടിക്കും സിപിഐയോ പാര്ട്ടിയുടെ മന്ത്രിമാരോ കൂട്ടുനില്ക്കരുതെന്ന് കൊല്ലം ജില്ലാസമ്മേളനത്തില് പ്രതിനിധികള്. പിണറായി വിജയനെയും സിപിഎമ്മിനെയും ഭയക്കുന്നത് എന്തിനാണെന്ന് പാര്ട്ടി നേതൃത്വം പറയണം. ജില്ലയില് സിപിഐയുടെ കരുനാഗപ്പള്ളി സീറ്റ് നഷ്ടമാക്കിയത് സിപിഎമ്മുകാരാണ്. മുന്തിയ ഇനം വാഹനത്തിലാണ് മുഖ്യമന്ത്രി സഞ്ചരിക്കുന്നത്. അതിനൊപ്പം പാര്ട്ടി മന്ത്രിമാരും നിലകൊള്ളുന്നത് അധികാരമേല്പ്പിച്ച പാവപ്പെട്ടവരോടുള്ള വെല്ലുവിളിയാണ്. പാര്ട്ടിയും മുന്നണിയും വീണ്ടും അധികാരത്തില് വരാതിരിക്കുകയാണ് നല്ലതെന്ന് അവര് ചിന്തിക്കുന്നു എന്നതാണ് സത്യം. സംസ്ഥാനസെക്രട്ടറി ബിനോയ് വിശ്വത്തിനും പാര്ട്ടി മന്ത്രിമാര്ക്കും രൂക്ഷവിമര്ശനമേറ്റു. പ്രവര്ത്തന റിപ്പോര്ട്ടിന്മേല് നടന്ന ചര്ച്ചയിലാണ് പ്രതിനിധികള് ആഞ്ഞടിച്ചത്.
പാര്ട്ടിയുടെ നാല് മന്ത്രിമാരും പരാജയമാണ്. അവര്ക്ക് മുഖ്യമന്ത്രി പിണറായിയെ കാണുമ്പോള് മുട്ടു വിറയ്ക്കും. പിണറായി വിജയന്റെ ഏകാധിപത്യമാണ് കാണുന്നത്. സിപിഐ മന്ത്രിമാര് സ്തുതിപാഠകരായി അധഃപതിച്ചു. നവകേരള സദസ് മുഖ്യമന്ത്രിയെ പുകഴ്ത്തുന്നതിന് മാത്രമുള്ള വേദിയാക്കി സിപിഐ മന്ത്രിമാര് ഉപയോഗിച്ചു. കുന്നത്തൂരില് മുഖ്യമന്ത്രി എത്തിയപ്പോള് ‘നവകേരളത്തിന്റെ ശില്പി വരുന്നു’വെന്ന് സിപിഐയുടെ മന്ത്രി മൈക്കിലൂടെ വിളിച്ചുപറഞ്ഞു. നവകേരളശില്പി സി. അച്യുതമേനോന് ആണ്. കൂടുതല് ഭംഗിയായി സ്തുതി പറയുന്നവര് കേമന്മാര് എന്ന നിലയിലുള്ള മത്സരമാണ് നവകേരള സദസില് കണ്ടതെന്നും വിമര്ശനമുയര്ന്നു. മാവേലി സ്റ്റോറുകള് പൂച്ചയുടെ പ്രസവമുറികളായെന്ന് കുന്നത്തൂരില് നിന്നുള്ള പ്രതിനിധി പറഞ്ഞു.
മാവേലി സ്റ്റോറുകളില് പാറ്റകള് പോലും പട്ടിണിയാണെന്ന് കൊല്ലം ഈസ്റ്റില് നിന്നുള്ള പ്രതിനിധി പരിഹസിച്ചു. സിപിഐ മന്ത്രിമാര് എന്ന വേറിട്ടുള്ള സ്വീകാര്യതയും മതിപ്പും കുറഞ്ഞുവരുന്നു. ഇത് ഗൗരവമായി കാണണം. സര്ക്കാരിനു നേതൃത്വം കൊടുക്കുന്നവരും ഇടതുനേതൃത്വവും ലളിത ജീവിതത്തിലും മൂല്യങ്ങള് ഉയര്ത്തിപ്പിടിക്കുന്നതിലും സമൂഹത്തിനു മാതൃകയാകണമെന്നും പ്രതിനിധികള് പറഞ്ഞു.
കാനം രാജേന്ദ്രന്റെ പിന്തുടര്ച്ചവകാശി എന്ന നിലയില് പ്രചരിപ്പിച്ചാണ് ബിനോയ് വിശ്വം സെക്രട്ടറിയായത്. ഇങ്ങനെയൊരു ഏര്പ്പാട് കമ്യൂണിസ്റ്റ് പാര്ട്ടിയില് ഒരുകാലത്തും ഉണ്ടായിട്ടില്ല. പാര്ട്ടിയുടെ ചരിത്രത്തില് ബിനോയ് വിശ്വം ദുര്ബലനായ സെക്രട്ടറിയാണെന്നും നിലപാടുകളില് വ്യക്തതയില്ലെന്നും കുന്നിക്കോട്ടു നിന്നുള്ള പ്രതിനിധി ചൂണ്ടിക്കാട്ടി. പാര്ട്ടിക്ക് രാജ്യസഭാ സീറ്റ് ലഭിച്ചപ്പോള് സിപിഎമ്മിന്റെ ഔദാര്യമാണെന്നാണ് പാര്ട്ടി സെക്രട്ടറി പറഞ്ഞത്. ഇത് പ്രവര്ത്തകര്ക്ക് അപമാനമുണ്ടാക്കി. പാര്ട്ടി സെക്രട്ടറി ഇങ്ങനെ മഹാദുര്ബലനാകരുത്, വെളിയം ഭാര്ഗവന് അടക്കമുള്ള മുന്ഗാമികള് അതിശക്തമായി സിപിഎമ്മിനെതിരെ പ്രതികരിച്ചിട്ടുണ്ട്. കുണ്ടറയിലെ കൂട്ടരാജിയില് ബിനോയ് വിശ്വത്തിന്റെ മറുപടി ഒട്ടും ആശാസ്യമല്ലെന്നും ഇങ്ങനെ പോയാല് കൊടിപിടിക്കാന് പോലും ആളില്ലാതാകുമെന്നും വിമര്ശനമുയര്ന്നു.
