ന്യൂദല്ഹി: ട്രംപിന്റെ ഉരുളയ്ക്ക് അപ്പപ്പോള് ഉപ്പേരി കൊടുക്കുകയാണ് ഇന്ത്യ. ഇന്ത്യയുടെ സമ്പദ്ഘടന മരിച്ചുവെന്ന ട്രംപിന്റെ പ്രസ്താവനയ്ക്ക് ഇന്ത്യയുടെ സമ്പദ്ഘടന മരിച്ചിട്ടില്ലെന്ന് പാര്ലമെന്റില് വ്യാഴാഴ്ച വാണിജ്യമന്ത്രി പീയൂഷ് ഗോയല് മറുപടി നല്കി.
ഇന്ത്യയുടെ സമ്പദ്ഘടന മരിച്ചിട്ടില്ലെന്ന് മാത്രമല്ല, അത് ലോകത്തിലെ ഏറ്റവും വേഗത്തില് വളരുന്ന സമ്പദ്ഘടനയാണ്. – പീയൂഷ് ഗോയല് പറഞ്ഞു. ഇന്ത്യയും ട്രംപും തമ്മിലുള്ള വാക്ക് തര്ക്കം മൂര്ച്ഛിക്കുന്നതിന്റെ ഭാഗമാണ് പീയൂഷ് ഗോയല് നല്കിയ മറുപടി.
നേരത്തെ റഷ്യയുടെ കയ്യില് നിന്നും എണ്ണ വാങ്ങരുതെന്ന് ട്രംപ് ഭീഷണിപ്പെടുത്തിയപ്പോള് ഇന്ത്യയിലെ ജനങ്ങളുടെ ഊര്ജ്ജസുരക്ഷ കാറ്റില് പറത്താന് കഴിയില്ലെന്നായിരുന്നു ഇന്ത്യയുടെ മറുപടി. പെട്രോളും ഡീസലും വിലക്കുറവില് ഇന്ത്യയിലെ ജനങ്ങള്ക്ക് നല്കാന് സാധിക്കണം. അതിന് റഷ്യയില് നിന്നും എണ്ണ വാങ്ങിയേ തീരൂ എന്ന നിലപാടിലാണ് ഇന്ത്യ. മാത്രമല്ല, യൂറോപ്യന് രാജ്യങ്ങള് റഷ്യയില് നിന്നും വാതകം വാങ്ങുമ്പോള് ഇന്ത്യയോട് മാത്രം റഷ്യയുടെ ഇന്ധനം വാങ്ങരുതെന്ന് പറയുന്നത് ഇരട്ടത്താപ്പാണെന്നാണ് ഇന്ത്യയുടെ നിലപാട്. ഇതിന് പ്രതികാരമായി ഇന്ത്യയ്ക്കെതിരെ 25 ശതമാനം വ്യാപാരതീരുവ ഏര്പ്പെടുത്തി ശിക്ഷിക്കുകയായിരുന്നു ട്രംപ്. പക്ഷെ നേരത്തെ യുകെയുമായി സ്വതന്ത്രവ്യാപാരക്കരാര് ഒപ്പുവെച്ചതിനാല് ഇത് ഇന്ത്യയ്ക്ക് വലിയ ഭീഷണിയാകില്ലെന്നാണ് കരുതുന്നത്.
നേരത്തെ ഇന്ത്യാ പാക് യുദ്ധം താന് പറഞ്ഞിട്ടാണ് നിര്ത്തിയതെന്ന് ട്രംപ് പ്രഖ്യാപിച്ചിരുന്നു. ഇതിനെതിരെ ഇന്ത്യന് പ്രധാനമന്ത്രി മോദിയും വിദേശകാര്യമന്ത്രി ജയശങ്കറും രംഗത്തെത്തിയിരുന്നു. ആരും പറഞ്ഞിട്ടല്ല, പാകിസ്ഥാന് കെഞ്ചിയതുകൊണ്ടാണ് ഇന്ത്യ യുദ്ധം നിര്ത്തിയതെന്നായിരുന്നു ഇന്ത്യുയുടെ മറുപടി.
