കോട്ടയം: എത്ര തന്നെ തഴഞ്ഞാലും സിപിഎം വിടില്ലെന്ന് വ്യക്തമാക്കി മുന് എംപി കെ.സുരേഷ് കുറുപ്പ്. ഏറ്റുമാനൂരില് യുഡിഎഫ് സ്ഥാനാര്ത്ഥിയായി മല്സരിക്കാന് പോവുകയാണെന്ന പ്രചാരണത്തോട് പ്രതികരിക്കുകയായിരുന്നു അദ്ദേഹം. കുറേക്കാലമായി സിപിഎം പദവികളൊന്നും നല്കാതെ സുരേഷ്് കുറിപ്പിനെ ഒതുക്കിയിട്ടിരിക്കുകയാണ്. പാര്ട്ടിയെ ബുദ്ധിമുട്ടിലാക്കും വിധം കഴിഞ്ഞ ദിവസം ഒരു പത്രത്തില് വന്ന ഇന്റര്വ്യൂവും നേതൃത്വത്തിന്റെ കടുത്ത വിമര്ശനത്തിനും കാരണമായിരുന്നു. ഈ സാഹചര്യത്തില് പാര്ട്ടി വിടുമെന്നാണ് ചില മാധ്യമങ്ങള് പങ്കുവച്ച നിഗമനം.
സുരേഷ് കുറുപ്പിന്റെ ഫേസ് ബുക്ക് പോസ്റ്റിന്റെ പ്രസക്തഭാഗങ്ങള്: കഴിഞ്ഞ കുറെ ദിവസങ്ങളായി ന്യൂസ് 18 ചാനലും അതിനെ തുടര്ന്ന് മറ്റു ചിലരും എന്നെക്കുറിച്ച് തികച്ചും വാസ്തവ വിരുദ്ധമായ പ്രചാരണങ്ങള് നടത്തിക്കൊണ്ടിരിക്കുകയാണ്. ഞാന് ഏറ്റുമാനൂരില് യു ഡി എഫ് സ്ഥാനാര്ത്ഥിയായി മല്സരിക്കാന് പോവുകയാണ് എന്നതാണ് ഈ പ്രചാരണം.
ഞാന് 1972 ല് സിപിഐ (എം) ല് അംഗമായതാണ്.അന്നു തൊട്ട് ഇന്നുവരെ സിപിഐ (എം) ന്റെ രാഷ്ട്രീയ നിലപാടുകളോട് ഒരു അഭിപ്രായ വ്യത്യാസവും എനിക്കില്ല.
പാര്ട്ടി എന്റെ രാഷ്ട്രീയ ജീവിതത്തിന്റെ പ്രതിരൂപവും പതാകയുമാണ്.
ഞാന് രാഷ്ട്രീയം മറന്ന് ഏതെങ്കിലും സ്ഥാനമാനങ്ങളുടെ പുറകെ പായുന്ന
ഒരാളല്ല. തിരഞ്ഞെടുപ്പോ അതിലൂടെ ലഭിക്കുന്ന സ്ഥാനലബ്ധികളോ എനിക്ക് പ്രധാനമല്ല. എന്റെ ഇടതുപക്ഷ രാഷ്ട്രീയ പ്രവര്ത്തനത്തിന്റെ ഭാഗമായി വന്ന അവസരങ്ങള് മാത്രമായിരുന്നു അതെല്ലാം തന്നെ എന്റെ രാഷ്ട്രീയമാണ് എനിക്ക് മുഖ്യം എന്ന് എന്നെ സ്നേഹിക്കുന്ന മിത്രങ്ങളേയും എന്നില് വിശ്വാസമര്പ്പിച്ചിട്ടുള്ള ജനങ്ങളേയും എനിക്കറിയാത്ത കാരണങ്ങളാല് എന്നോട് ശത്രുഭാവേന പ്രവര്ത്തിക്കുന്നവരേയും അറിയിക്കട്ടെ.
