കാലടി: ഗീതാ സ്വാദ്ധ്യായ സമിതിയുടെ ആഭിമുഖ്യത്തില് 2000ല് തിരുവനന്തപുരത്തു നടന്ന അന്താരാഷ്ട്ര ഗീതാ സെമിനാറിന്റെ രജത ജൂബിലിയോട് അനുബന്ധിച്ച് ആഗസ്ത് 31-ാംതീയതി ശ്രീരാമകൃഷ്ണ ആശ്രമം, ഭാരതീയ വിചാര കേന്ദ്രം, ഗീതാ സ്വാദ്ധ്യായസമിതി എന്നിവയുടെ ആഭിമുഖ്യത്തില് കാലടി ശ്രീരാമകൃഷ്ണാശ്രമത്തില് അന്താരാഷ്ട്ര ഗീത സെമിനാര് സംഘടിപ്പിക്കുന്നു.
ഗീതായനം സെമിനാറില് തേജസ്വിസൂര്യ എംപി, ശ്രീവിദ്യാനന്ദ സ്വാമികള്, സ്വാമി ധര്മചൈതന്യ, സ്വാമി പൂര്ണാമൃതാനന്ദപുരി, ഡോ. കെ.എസ്. രാധാകൃഷ്ണന്, ബ്രഹ്മചാരി സുധീര് ചൈതന്യ, ഡോ. മാല രാമനാഥ്, അഡ്വ. ശങ്കു ടി. ദാസ്, കൃഷ്ണ ഗോപാല്ജി തുടങ്ങിയവര് പങ്കെടുക്കും.
ഒരു വര്ഷത്തെ രജത ജൂബിലി ആഘോഷങ്ങളുടെ ഉദ്ഘാടന വേദിയാണ് ഇത്. തുടര്ന്ന് എല്ലാ ജില്ലകളിലും ഭഗവത്ഗീത സത്സംഗങ്ങളും പ്രഭാഷണങ്ങളും പഠന ക്ലാസുകളും സംഘടിപ്പിക്കുന്നുണ്ട്. നാളെ വൈകിട്ട് 6ന് ശൃംഗേരി മഠത്തില് സെമിനാറിന്റെ മുന്നോടിയായി സത്സംഗവും പ്രഭാഷണവും നടക്കും.
അന്താരാഷ്ട്ര കായിക താരവും ലോക ചാമ്പ്യനുമായ ജോബി മാത്യു അധ്യക്ഷത വഹിക്കുന്ന യോഗത്തില് പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര് മുഖ്യപ്രഭാഷണം നടത്തും. ഗീതായനത്തില് പങ്കെടുക്കാന് താല്പര്യമുള്ളവര് വെബ്സൈറ്റ് മുഖേന രജിസ്റ്റര് ചെയ്യേണ്ടതാണ്. വിവരങ്ങള്ക്ക് 9847598896.
