ശിക്ഷാ സംസ്കൃതി ഉത്ഥാന് ന്യാസിന്റെ ആഭിമുഖ്യത്തില് കൊച്ചിയില് നടന്ന ജ്ഞാനസഭ ഭാരതീയ ജ്ഞാനപരമ്പരയുടെ മഹത്വവും പ്രാധാന്യവും ലോകത്തിനു മുന്പില് പ്രഖ്യാപിക്കുന്നതായിരുന്നു. ജ്ഞാനസഭ എന്ന വിദ്യാഭ്യാസ സമ്മേളനത്തിന് ശ്രീശങ്കരന്റെ ജന്മഭൂമിയായ കേരളം വേദിയായി തെരഞ്ഞെടുത്തതിലും ഏറെ സവിശേഷതയുണ്ട്. ദേശീയ വിദ്യാഭ്യാസ നയം പ്രഖ്യാപിച്ചതിനുശേഷം കഴിഞ്ഞ അഞ്ചു വര്ഷങ്ങളിലുണ്ടായ മാറ്റങ്ങളെക്കുറിച്ചുള്ള വിലയിരുത്തലും അടുത്ത അഞ്ചു വര്ഷത്തെ പദ്ധതികളുമാണ് സമ്മേളനത്തില് ചര്ച്ചയായത്. ആര്എസ്എസ് സര്സംഘചാലക് ഡോ.മോഹന് ഭാഗവത് നാലുദിവസവും മാര്ഗദര്ശനത്തിനായി ഉണ്ടായിരുന്നു. ഇന്നത്തെ വിദ്യാഭ്യാസം അത്യന്താധുനികമാണെങ്കിലും അതിലും ആധുനികമാണ് ഭാരതീയ ജ്ഞാനപരമ്പര എന്നാണ് സര്സംഘചാലക് ചൂണ്ടിക്കാട്ടിയത്. ആംഗലേയ മാനസികാവസ്ഥയില് നിന്നു പുറത്തുവന്ന് ചിന്തിക്കേണ്ടേതിന്റെ പ്രാധാന്യവും വ്യക്തമാക്കിയിരുന്നു.
രാജ്യത്തെ അഞ്ചു വിദ്യാഭ്യാസ മന്ത്രിമാരും ഇരുനൂറിലധികം വൈസ്ചാന്സലര്മാരും ആയിരത്തോളം വിദ്യാഭ്യാസ വിദഗ്ധരും പങ്കെടുത്ത ചര്ച്ചകള് നൈമിശാരണ്യത്തിലെ ചിന്തന്സഭയെ ഓര്മ്മപ്പെടുത്തുന്നതായിരുന്നു. ഭാവിഭാരതത്തെ രൂപപ്പെടുത്തുന്നതിനുള്ള സമഗ്രമായ കര്മപദ്ധതി രൂപപ്പെടുത്തുന്നതിന് ജ്ഞാനസഭയ്ക്കായി. വിദ്യാഭ്യാസത്തിലൂടെ വികസിത ഭാരതം എന്നതായിരുന്നു ആപ്തവാക്യം. സ്വാതന്ത്ര്യത്തിന്റെ ശതാബ്ദി ആഘോഷിക്കുന്ന 2047ല് ഭാരതം വിശ്വഗുരുവാകുന്നത് വിദ്യാഭ്യാസ പരിവര്ത്തനത്തിലൂടെയായിരിക്കുമെന്ന കാര്യവും ജ്ഞാനസഭ എടുത്ത് പറയുന്നു.
വിദ്യാഭ്യാസ രംഗത്ത് കേരളം ഒട്ടേറെ നേട്ടങ്ങള് ഉണ്ടാക്കിയിട്ടുണ്ടെങ്കിലും അമിത രാഷ്ട്രീയവത്കരണം കേരളത്തെ പിന്നോട്ടടിച്ചിരിക്കുകയാണ്. വിദ്യാഭ്യാസവുമായി യാതൊരുബന്ധവുമില്ലാത്തവരാണ് സിന്ഡിക്കേറ്റിലും ഗവേണിങ് ബോഡിയിലും ഉള്ളത് എന്നതാണ് ഇതിനുകാരണം. ഉന്നത വിദ്യാഭ്യാസം മാതൃഭാഷയിലായിരിക്കേണ്ടതിന്റെ പ്രാധാന്യവും ജ്ഞാനസഭ ചൂണ്ടിക്കാണിച്ചു.
അതേസമയം ഭാരതത്തിന്റെ വിദ്യാഭ്യാസ മേഖലക്കാകെ പുതിയ ദിശാബോധം പകര്ന്ന ജ്ഞാനസഭയില് കേരളത്തില് നിന്നുള്ള വൈസ് ചാന്സലര്മാര് പങ്കെടുത്തതിനെ വിവാദമാക്കുവാനാണ് ഒരു വിഭാഗം ശ്രമിച്ചത്. ചാന്സലര് കൂടിയായ ഗവര്ണര് പങ്കെടുത്ത വിദ്യാഭ്യാസ സമ്മേളനത്തില് പങ്കെടുത്തതിനെതിരെ രണ്ടു വിദ്യാഭ്യാസ മന്ത്രിമാര് വിമര്ശനവുമായി രംഗത്തെത്തിയത് ന്യായീകരിക്കാവുന്നതല്ല. എകെജി സെന്ററില് നിന്നുള്ള തിട്ടൂരമനുസരിച്ച് പ്രവര്ത്തിക്കേണ്ടവരല്ല വൈസ് ചാന്സലര്മാര്. കേരളത്തിലെ ഉന്നത വിദ്യാഭ്യാസരംഗത്തെ ഇന്നത്തെ അവസ്ഥക്ക് കാരണവും ഇത്തരക്കാരാണ്. ഇവരില് നിന്നുള്ള വീണ്ടെടുപ്പാണ് കേരളം ആഗ്രഹിക്കുന്നത്. ഇതിന് അനുകൂലമായ ഒരു ദിശാസൂചകമായാണ് കേരളത്തിലെ വൈസ് ചാന്സലര്മാര് ജ്ഞാനസഭയില് പങ്കെടുത്തത് വിലയിരുത്തപ്പെടുന്നത്.
