ന്യൂദല്ഹി: രാഹുല് ഗാന്ധിയ്ക്ക് തന്റെ പിതാവ് രാജീവ് ഗാന്ധി ഉണ്ടാക്കിയ തെരഞ്ഞെടുപ്പ് പരിഷ്കാരമായ എസ് ഐ ആര് അഥവാ സ്പെഷ്യല് ഇന്റന്സീവ് റിവിഷന് എന്ന കാര്യം അറിയില്ലെന്നത് കഷ്ടമാണെന്ന് ബിജെപി എംപി നിഷികാന്ത് ദുബെ. ബീഹാറില് തെരഞ്ഞെടുപ്പ് കമ്മീഷന് സ്പെഷ്യല് ഇന്റന്സീവ് റിവിഷന് (എസ് ഐ ആര് ) നടത്തി ബംഗ്ലാദേശില് നിന്നും അനധികൃതമായി നുഴഞ്ഞു കയറിയവര് ഉള്പ്പെടെ ഏകദേശം 65 ലക്ഷം വോട്ടര്മാരെ വോട്ടര്പട്ടികയില് നിന്നും നീക്കം ചെയ്തതിനെതിരെ രാഹുല് ഗാന്ധി ബഹളംവെയ്ക്കുന്ന സാഹചര്യത്തിലാണ് ബിജെപി എംപി നിഷികാന്ത് ദുബെയുടെ ഈ വിശദീകരണം.
“18 മുതല് 21വരെ പ്രായമുള്ള യുവജനങ്ങള്ക്ക് വോട്ടവകാശം നടപ്പാക്കിയപ്പോള് അന്നത്തെ പ്രധാനമന്ത്രിയായിരുന്ന രാജീവ് ഗാന്ധി സ്പെഷ്യല് ഇന്റന്സീവ് റിവിഷനെക്കുറിച്ച് (എസ് ഐ ആര്) പറഞ്ഞിരുന്നു. രാഹുല് ഗാന്ധിയ്ക്ക് നിയമം അറിയില്ല. അദ്ദേഹത്തിന്റെ അച്ഛന്റെ നിയമമായ എസ് ഐ ആര് പാസാക്കപ്പെട്ടു. ഈ നിയമപ്രകാരം വോട്ടര്പട്ടികയില് നിന്നും നീക്കം ചെയ്യപ്പെട്ടവര്ക്ക് ആഗസ്ത് ഒന്ന് മുതല് സെപ്തംബര് ഒന്ന് വരെ വീണ്ടും അപേക്ഷ നല്കാം. ഇതുവരെ വോട്ടര്പട്ടിക അച്ചടിച്ചിട്ടില്ല. തെരഞ്ഞെടുപ്പ് കമ്മീഷന്റെ വോട്ടര് പട്ടിക വന്നിട്ടില്ല. സെപ്തംബര് ഒന്നിന് ശേഷമേ ഈ വോട്ടര്പട്ടിക തെരഞ്ഞെടുപ്പ് കമ്മീഷന് അച്ചടിക്കൂ.” – നിഷികാന്ത് ദുബെ വ്യക്തമാക്കി.
“ഇന്ത്യയിലെ പൗരന്മാരെന്ന വോട്ടര് കാര്ഡുകള്ളുവര്ക്ക് മാത്രമേ ഇതില് വോട്ട് ചെയ്യാന് കഴിയൂ. അല്ലാതെ ബംഗ്ലാദേശി പൗരന്മാര്ക്കല്ല. ബംഗ്ലാദേശി പൗരന്മാരുടെ വോട്ടര്പട്ടിക ഉണ്ടാക്കാനാണ് കോണ്ഗ്രസും രാഷ്ട്രീയ ജനതാദള് (ആര്ജെഡി)ഉം ശ്രമിക്കുന്നത്. മുസ്ലിം പ്രീണന രാഷ്ട്രീയമാണ് അവര് നടപ്പാക്കുന്നത്. ഇന്ന് ഡിംപിള് യാദവ് ഇസ്ലാം വേഷം ധരിയ്ക്കാതെ പള്ളിയില് പ്രവേശിച്ചതിന് ഒരു ഇസ്ലാമിക പണ്ഡിതന് അവരെ വിമര്ശിക്കുന്നത് കണ്ടു. പക്ഷെ അതിനുള്ള ധൈര്യം കോണ്ഗ്രസിനില്ല. “- നിഷികാന്ത് ദുബെ അഭിപ്രായപ്പെട്ടു.
