ന്യൂദല്ഹി: യുഎസില് 2001 സെപ്തംബര് 11ന് ആക്രമണം നടത്തിയ ഭീകരരെ വധിക്കാന് യുഎസ് 18 മാസമെടുത്തു. ആ ഭീകരാക്രമണത്തിന്റെ മുഖ്യആസൂത്രകനായ ഒസാമ ബിന് ലാദനെ വധിച്ചത് പിന്നെയും 10 വര്ഷത്തിന് ശേഷം 2011നാണ്. എന്നാല് ഇന്ത്യ പഹല്ഗാമില് 26 ടൂറിസ്റ്റുകളെ വെടിവെച്ച് കൊന്ന ഭീകരരെ വേട്ടയാടി വധിച്ചത് വെറും 97 ദിവസത്തിനുള്ളില്. ഇത്രയും ചുരുങ്ങിയ നാളുകള്ക്കുള്ളില് അങ്ങേയറ്റം പരിശീലനം ലഭിച്ച ഭീകരരെ വേട്ടയാടിപ്പിടിച്ച ഇന്ത്യന് സേനയുടെ മിടുക്ക് അപാരമാണെന്ന് അമേരിക്കയിലെ മോഡേണ് വാര് ഇന്സ്റ്റിറ്റ്യൂട്ടിന്റെ അധ്യക്ഷനും യുദ്ധവിദഗ്ധനുമായ ജോണ് സ്പെന്സര്.
“യുദ്ധത്തിന്റെ കാര്യമെടുത്താല്, ഈ മൂന്ന് പഹല്ഗാം ഭീകരരെ വധിക്കാന് ഇന്ത്യ നടത്തിയ ഉയര്ന്ന അപകടസാധ്യതയുള്ള നൈറ്റ് ഓപ്പറേഷന് അങ്ങേയറ്റം ക്ലിഷ്ടവും അവിശ്വസനീയവുമാണ്. വെറും 97 ദിവസത്തിനുള്ളില് ഈ ഭീകരരെ ഒറ്റപ്പെടുത്തി, വധിച്ചതിന്റെ വേഗത നിസ്സാരമല്ല. കാരണം അമേരിക്കയില് ആക്രമണം നടത്തിയ അല് ഖ്വെയ്ദ ഭീകരരെ വധിക്കാന് അമേരിക്ക 18 മാസമെടുത്തു. ഒസാമ ബിന് ലാദനെ വധിക്കാന് 10 വര്ഷമെടുത്തപ്പോഴാണ് ഇന്ത്യ വെറും 97 ദിവസത്തിനുള്ളില് പഹല്ഗാം ഭീകരരെ ഒറ്റപ്പെടുത്തി വധിച്ചത്.” – ജോണ് സ്പെന്സര് പറഞ്ഞു. നേരത്തെ ഇന്ത്യ പാകിസ്ഥാനെതിരെ നടത്തിയ ഓപ്പറേഷന് സിന്ദൂറിനെക്കുറിച്ച് വിശദമായി പഠിച്ച വ്യക്തികൂടിയാണ് ജോണ് സ്പെന്സര്. പഹല്ഗാമില് 26 ഇന്ത്യന് ടൂറിസ്റ്റുകളെ പട്ടാപ്പകല് വെടിവെച്ച് കൊന്ന ശേഷം ഓഫാക്കിയ സാറ്റലൈറ്റ് ഫോണ് 97 ദിവസങ്ങള്ക്ക് ശേഷം ഓണാക്കിയതാണ് മൂന്ന് ഭീകരര്ക്ക് വിനയായത്. ചൈനീസ് നിര്മ്മിതമായിരുന്നു ഈ സാറ്റലൈറ്റ് ഫോണ്.
“കഴിഞ്ഞ കുറച്ചുനാളുകളായി ഇന്ത്യന് സേന ഇവരെ പിന്തുടര്ന്നിരുന്നു. മൂന്ന് നാല് ദിവസമായി ഇവരെ ശക്തമായി സേന പിന്തുടര്ന്നു. കശ്മീര് മലനിരകളില് അലഞ്ഞുതിരിയുന്ന നാടോടികളില് നിന്നുള്ള വിവരം വരെ ഈ ഭീകരരെ കൃത്യമായി അടയാളപ്പെടുത്താന് ഇന്ത്യ രഹസ്യപ്പൊലീസ് സംഘം ഉപയോഗിച്ചിരുന്നു. ഡ്രോണുകള് ഉപയോഗിച്ച് കൃത്യമായി ഭീകരരുടെ താവളം ട്രാക്ക് ചെയ്തു. അവരുടെ ചിത്രമെടുത്തു. ആക്രമണദൗത്യം പുലര്ച്ചെ ആയതിനാല് രാത്രി വിഷന് സാധ്യമാക്കുന്ന ഉപകരണങ്ങളും ഉപയോഗിച്ചിരുന്നു. ഹ്യൂമന് ഇന്റലിജന്സ്, സിഗ്നല് സ് ഇന്റലിജന്സ്, സാറ്റലൈറ്റ് ചിത്രങ്ങള് -ഇതെല്ലാം ആധുനികമായ രീതികള് കോര്ത്തിണക്കിക്കൊണ്ടുള്ള നീക്കമായിരുന്നല്ലോ ഓപ്പറേഷന് സിന്ദൂറില് കണ്ടത്. അത് തന്നെയാണ് ഓപ്പറേഷന് മഹാദേവിലും ഇന്ത്യന് സേന നടത്തിയത്. ഭീകരരുടെ സാറ്റലൈറ്റ് ഫോണ് ഓണാക്കിയത് മൂലം സിഗ്നല് ലഭിച്ചു, നിബിഢമായ വനത്തിനുള്ളില് ഭക്ഷണം കഴിക്കാന് ഈ ഭീകരര് തീയിട്ടിരുന്നു.”- ജോണ് സ്പെന്സര് വിശദമാക്കി.
“ആകാശത്ത് നല്ല കട്ടിയുള്ള മേഘമാലകള് നിറഞ്ഞിരിക്കുന്ന വനപ്രദേശമാണ് മഹാദേവ മലയ്ക്ക് ചുറ്റുമുള്ള വനപ്രദേശം. മലനിരകളും താഴ്വരകളും നിറഞ്ഞ അങ്ങേയറ്റം നിമ് ന്നോതനമാണീ ഭൂപ്രദേശം….ഇത്തരമൊരു വിഷമകരമായ ഭൂപ്രദേശത്ത് ഒരു ആക്രമണദൗത്യം നടത്തുക, കൃത്യമായി ഭീകരെ വധിക്കുക എന്നത് വളരെ ബുദ്ധിമുട്ടാണ്. മങ്ങിയ കാഴ്ച മാത്രമേ ഇവിടെ ലഭ്യമാകൂ. നിബിഢമായ വനവും കട്ടിയുള്ള മേഘങ്ങളും കാഴ്ച മറച്ചുകൊണ്ടേയിരിക്കും. ആധുനികമായ നൈറ്റ് വിഷന് ഉപകരണങ്ങളുടെ സഹായത്തോടെ വിജയകരമായി ഓപ്പറേഷന് നടത്താന് ഇന്ത്യന് സേനയ്ക്ക് സാധിച്ചു. രാത്രിയില് തന്നെ ഇവരുടെ വ്യക്തമായ ചിത്രങ്ങള് സാറ്റലൈറ്റ് സഹായത്തോടെ ഡ്രോണുകള്ക്ക് പകര്ത്താനായി. ഇന്ത്യന് പ്രതിരോധ സേന നേടിയെടുത്ത ഈ വിജയം നിസ്സാരമല്ല.സാധാരണ ഇത്തരം ഓപ്പറേഷനുകളില് ഇന്ത്യന് പട്ടാളക്കാര് കൊല്ലപ്പെടുക പതിവാണ്. ഇതും ഒരു പരിധിവരെ ഒഴിവാക്കാന് സാധിച്ചു.” – ജോണ് സ്പെന്സര് വിശദമാക്കുന്നു.
“പനാമ എന്ന പ്രദേശത്തെ കഷ്ടപ്പാടുകള് എനിക്ക് നേരിട്ടറിയാം. അത്രയ്ക്ക് ക്ലിഷ്ടമാണ് അവിടുത്തെ ഭൂപ്രദേശം. പ്രത്യേകിച്ചും മരങ്ങള് കുടപിടിക്കുന്ന സാഹചര്യത്തില് ഭീകരരുടെ നീക്കങ്ങള് തിരിച്ചറിയുക എളുപ്പമല്ല. അതുപോലുള്ള ഒരു സ്ഥലത്ത് ഭീകരരെ ഒറ്റപ്പെടുത്തുക എന്ന ദൗത്യം എളുപ്പമല്ല. അതാണ് ഇന്ത്യന് സേന സാധിച്ചത്. മാത്രമല്ല, ഇത്രയും ദുര്ഘടം പിടിച്ച ഒരു ഭൂപ്രകൃതിയില് അങ്ങേയറ്റം പരിശീലനം സിദ്ധിച്ച ഭീകരരെ പിടികൂടുക എന്നത് അസാധ്യം തന്നെയാണ്. ഈ മൂന്ന് പേരില് ഒരാളായ സുലൈമാന് പാകിസ്ഥാന് സേനയുടെ കമാന്ഡര് കൂടിയാണ്. അതുകൊണ്ട് തന്നെ ശത്രുക്കളുടെ നീക്കങ്ങള് നേരത്തെ കണ്ടെത്താനുള്ള സംവിധാനങ്ങള് അവരുടെ പക്കലും ഉണ്ടാകും. അതുകൊണ്ട് തന്നെ പരിശീലനം സിദ്ധിച്ച ഭീകരരെ വേട്ടയാടുക എളുപ്പമല്ല. പഹല്ഗാം ഭീകരര് ഉപയോഗിച്ചിരുന്ന ഷൂസ്, ആയുധങ്ങള്, എല്ലാം ആധുനികമായിരുന്നു. എകെ 47, എം4 കാര്ബൈന്, അമേരിക്കന് നിര്മ്മിതമായ എം9 തോക്കുകള് എന്നിവ ഇവര് ഉപയോഗിച്ചിരുന്നു. “- ജോണ് സ്പെന്സര് പറയുന്നു.
