തിരുവനന്തപുരം: പാമ്പുകടിയേറ്റാല് സര്ക്കാര് ചികില്സാ സഹായം നല്കുമെന്ന് അറിയാമോ? പാമ്പുകള് സംരക്ഷിത ജീവികളായതിനാല് അവ കടിച്ചാല് സര്ക്കാരിന് ഉത്തരവാദിത്വമുണ്ട്. അതിനാലാണ് സഹായം നല്കുന്നത്. ചികിത്സയില് കഴിയുന്നവര്ക്ക് പരമാവധി ഒരു ലക്ഷം രൂപവരെ സര്ക്കാര് നല്കും. നിയമപരമായി വനത്തിനുള്ളില് പ്രവേശിച്ച് പാമ്പുകടിയേറ്റ് മരിക്കുകയാണെങ്കില് 10 ലക്ഷം രൂപയും വനത്തിന് പുറത്താണെങ്കില് രണ്ട് ലക്ഷം രൂപയും നഷ്ടപരിഹാരമായി ആശ്രിതര്ക്ക് ലഭിക്കും.
സര്പ്പ ആപ്പിന്റെ ഉപയോഗം വ്യാപിപ്പിച്ചതോടെ പാമ്പു കടിയേറ്റ് മരിക്കുന്ന ആളുകളുടെ എണ്ണം ഗണ്യമായി കുറഞ്ഞതായി വനംവകുപ്പ് പറയുന്നു. പാമ്പു കടിയേറ്റുള്ള മരണങ്ങള് കുറയ്ക്കുന്നതിനും ജനവാസ മേഖലയിലെത്തിയ പാമ്പുകളെ സുരക്ഷിതമായി വനമേഖലയിലെത്തിക്കുന്നതിനുമായി ആരംഭിച്ച സര്പ്പ ആപ്പ് ആഗസ്റ്റില് അഞ്ച് വര്ഷം പൂര്ത്തിയാക്കുകയാണ്.
പാമ്പുകളെ തരംതിരിച്ചറിയാന് സഹായിക്കുന്ന വിവരങ്ങള്, ആന്റിവെനം ലഭ്യമായ ആശുപത്രികള്, അടിയന്തര സാഹചര്യങ്ങളില് ബന്ധപ്പെടേണ്ടവരുടെ ഫോണ് നമ്പറുകള് തുടങ്ങിയ വിവരങ്ങളാണ് സര്പ്പ ആപ്പിലുള്ളത്. പാമ്പുകളെ പിടികൂടുന്നതിനായി സംസ്ഥാനത്തുടനീളം ലൈസന്സുള്ള 3000ത്തോളം വോളന്റിയര്മാര് സര്പ്പയ്ക്ക് കീഴിലുണ്ട്. ഇതില് ജില്ലയില് മാത്രമായുള്ള നൂറോളം സര്ട്ടിഫൈഡ് വോളന്റിയര്മാരില് 20 പേര് സജീവമായി ഈ രംഗത്ത് പ്രവര്ത്തിക്കുന്നു.
