ജോര്‍ജ്ജിയ: ആദ്യ രണ്ട് ക്ലാസിക് ഗെയിമുകള്‍ സമനിലയില്‍ പിരിഞ്ഞതിനെ തുടര്‍ന്ന് ഫിഡെ ലോക വനിത ചെസ്സില്‍ ഇന്ത്യയുടെ കൊനേരു ഹംപിയും ദിവ്യദേശ്മുഖും തമ്മിലുള്ള മത്സരം വിജയിയെ കണ്ടെത്താന്‍ റാപ്പിഡിലേക്ക് കടന്നു. 15 മിനിറ്റ് മാത്രം അനുവദിക്കുന്ന ഗെയിം. ഇവിടെ അതിവേഗകരുനീക്കമാണ് കാര്യം. ഓരോ നീക്കം നടത്തുമ്പോഴും 10 സെക്കന്‍റ് അധികം ലഭിക്കും. റാപ്പിഡ് എന്ന അതിവേഗ ചെസ് ഗെയിമിലും വിദഗ്ധരാണ് ഹംപിയും ദിവ്യ ദേശ്മുഖും. ആദ്യ റാപ്പിഡ് മത്സരം സമനിലയില്‍ കലാശിച്ചു. 81 നീക്കങ്ങള്‍ക്കൊടുവിലാണ് ഇരുവരും സമനിലയില്‍ പിരിഞ്ഞത്.
രണ്ടാമത്തെ ഗെയിമില്‍ കൊനേരു ഹംപിയ്‌ക്കായിരുന്നു വെള്ളക്കരു. പൊതുവേ വെള്ളക്കരു ഉപയോഗിക്കുന്നവര്‍ക്ക് ആദ്യ കരുനീക്കം ലഭിക്കുന്നതിനാല്‍ മുന്‍തൂക്കമുണ്ടാകും എന്ന് പറയാറുണ്ട്. എന്നാല്‍ ഈ കളിയിലാണ് ഹംപി തോല്‍വി ഏറ്റുവാങ്ങിയത്.
കറ്റാലന്‍ ഓപ്പണിംഗ് ശൈലിയിലാണ് കൊനേരു ഹംപി കളിച്ചത്. അതിവേഗമാണ് ദിവ്യ രണ്ടാമത്തെ ഗെയിമില്‍ കരുനീക്കിയത്. നല്ല പതിരോധം തീര്‍ത്തുകൊണ്ടായിരുന്നു ദിവ്യയുടെ മുന്നേറ്റം. അതേ സമയം കൊനേരു ഹംപി കരുനീക്കങ്ങള്‍ക്ക് കൂടുതല്‍ സമയം എടുത്തു. ആദ്യ പത്ത് നീക്കങ്ങള്‍ക്ക് തന്നെ അഞ്ച് മിനിറ്റോളം ഹംപി എടുത്തിരുന്നു.
അവസാന കരുനീക്കങ്ങള്‍ക്കിടയില്‍ ഹംപി വരുത്തിയ പിഴവില്‍ നിന്നാണ് ദിവ്യ വിജയം കണ്ടെത്തിയത്. രണ്ടു പേര്‍ക്കും ഓരോ റൂക്കും (തേര്) മൂന്ന് കാലാളുകളും ആയിരുന്നു അവശേഷിച്ചിരുന്നത്. 54ാം നീക്കത്തില്‍ ആണ് ഹംപി പിഴവ് വരുത്തിയതെന്ന് മുന്‍ലോകചാമ്പ്യന്‍ വിശ്വനാഥന്‍ ആനന്ദ് പറഞ്ഞു. ഇതോടെയാണ് ദിവ്യ ദേശ്മുഖ് വിജയത്തിന് വഴിയൊരുക്കിയത്. നേരത്തെ 42ാം കരുനീക്കത്തില്‍ ദിവ്യ ഒരു പിഴവ് വരുത്തിയിരുന്നെങ്കിലും അത് കണ്ടെത്താന്‍ ഹംപിയ്‌ക്ക് കഴിഞ്ഞില്ലെന്ന് വിശ്വനാഥന്‍ ആനന്ദ് പറഞ്ഞു. ആ അവസാന നീക്കങ്ങള്‍ കാണാം:
ദിവ്യ വിജയിച്ച രണ്ടാം ഗെയിമിലെ അവസാന കരുനീക്കങ്ങള്‍ കാണാം:
