തിരുവനന്തപുരം: തേവലക്കര സ്കൂളില് എട്ടാം ക്ലാസ് വിദ്യാര്ഥി മിഥുന് വൈദ്യുതാഘാതമേറ്റ് മരിച്ചതില് വീഴ്ചവരുത്തിയ കെഎസ്ഇബി ഉദ്യോഗസ്ഥരുടെ പേരെടുത്ത് പറഞ്ഞ് നടപടി വേണമെന്ന് വൈദ്യുതി മന്ത്രി കെ കൃഷ്ണന്കുട്ടി .ആര്ക്കുമെതിരെ നടപടിക്ക് ശുപാര്ശയില്ലാതിരുന്ന കെഎസ്ഇബി മുഖ്യ സുരക്ഷാ കമീഷണറുടെ റിപ്പോര്ട്ട് മന്ത്രി തള്ളി.
റിപ്പോര്ട്ടിലെ വീഴ്ച പരിശോധിക്കുമെന്ന് മന്ത്രി പറഞ്ഞു. കുറ്റക്കാരായ ഉദ്യോഗസ്ഥര് ആര് എന്നത് വ്യക്തമാക്കണമായിരുന്നു. കുറ്റക്കാരുടെ പേര് അടങ്ങുന്ന റിപ്പോര്ട്ട് ഒരാഴ്ചക്കുള്ളില് സമര്പ്പിക്കാന് കെഎസ്ഇബി ചെയര്മാന് നിര്ദ്ദേശം നല്കി.
പാലക്കാട് കൊടുമ്പില് വയോധികന് വൈദ്യുതാഘാതമേറ്റ് മരിച്ച സംഭവത്തില് എന്താണ് സംഭവിച്ചതെന്ന് അന്വേഷിക്കുമെന്നും കുറ്റക്കാര്ക്കെതിരെ നടപടി എടുക്കുമെന്നും മന്ത്രി കെ കൃഷ്ണകുട്ടി പറഞ്ഞു.
വൈദ്യുതി ലൈനിന് താഴെ തകര ഷെഡ് നിര്മിച്ചതില് കെഎസ്ഇബിക്ക് വീഴ്ച ഉണ്ടായെന്ന് റിപ്പോര്ട്ടില് പറയുന്നുണ്ട്. എന്നാല് വീഴ്ച വരുത്തിയ ഉദ്യോഗസ്ഥരെ സംരക്ഷിച്ചുകൊണ്ടായിരുന്നു റിപ്പോര്ട്ട്.
എട്ട് കൊല്ലം മുമ്പാണ് നിലവിലുള്ള ലൈനിന് താഴെ സൈക്കിള് പാര്ക്ക് ചെയ്യാന് തകര ഷെഡ് നിര്മിച്ചതെന്ന് റിപ്പോര്ട്ടില് ചൂണ്ടിക്കാട്ടുന്നു. വൈദ്യുതി ലൈനിന് താഴെ എന്ത് തരം നിര്മാണത്തിനും കെഎസ്ഇബിയുടെ മുന്കൂര് അനുമതി വേണം. എന്നാല്, സ്കൂള് മാനേജ്മെന്റ് അനുമതി തേടിയില്ല. തറനിരപ്പില് നിന്നും തകര ഷീറ്റില് നിന്നും ലൈനിലേക്ക് സുരക്ഷിത അകലം ഇല്ല.
പിന്നീട് ഇക്കാര്യം ശ്രദ്ധയില്പ്പെട്ടെങ്കിലും നടപടി എടുക്കുന്നതില് കെഎസ്ഇബി ഉദ്യോഗസ്ഥര്ക്ക് വീഴ്ച സംഭവിച്ചു. സ്കൂള് മാനേജര്ക്ക് നോട്ടീസ് നല്കി പ്രശ്നം പരിഹരിക്കണമായിരുന്നെങ്കിലും ഒരു നടപടിയും ഉണ്ടായില്ല. ഇക്കാര്യത്തില് നിലവിലെ അസിസ്റ്റന്റ് എന്ജിനിയറെ കുറ്റപ്പെടുത്തന് കഴിയില്ലെന്നാണ് റിപ്പോര്ട്ടില് വ്യക്തമാക്കുന്നത്.ഷെഡ് പണിതത് ഇപ്പോഴത്തെ അസിസ്റ്റന്റ് എന്ജിനീയറുടെ കാലത്തല്ലെന്നാണ് വാദം.
എന്നാല്, വീഴ്ച, വീഴ്ച തന്നെയെന്ന് മന്ത്രി കെ. കൃഷ്ണന്കുട്ടിയുടെ നിലപാട്. വീഴ്ച വരുത്തിയ ഉദ്യോഗസ്ഥരുടെ പേരെടുത്ത് പറഞ്ഞ് നടപടിയെടുക്കണമെനന് മന്ത്രി കെഎസ്ഇബി ചെയര്മാനോട് നിര്ദ്ദേശിച്ചു.
അപകടത്തിന് രണ്ട് ദിവസം മുമ്പ് അവിടെ പോസ്റ്റ് സ്ഥാപിക്കാമെന്ന് അസിസ്റ്റന്റ് എഞ്ചിനീയര് സ്കൂള് മാനേജരോട് നിര്ദ്ദേശിച്ചിരുന്നു.ഷെഡിന്റെ ഒരു ഭാഗം പൊളിച്ച് പോസ്റ്റിട്ട് ലൈന് ഉയര്ത്താമെന്നായിരുന്നു നിര്ദേശം.എന്നാല്, മാനേജ്മെന്റ് കമ്മിറ്റി ചേര്ന്നശേഷം അറിയിക്കാമെന്നായിരുന്നു മാനേജരുടെ പ്രതികരണം. സാങ്കേതിക വാദം ഉയര്ത്തിയ കെഎസ്ഇബി മിഥുന് മരിച്ചതിന് പിന്നാലെ ലൈനുകള് മാറ്റിയിരുന്നു.
