കല്പ്പറ്റ: കല്പ്പറ്റ സ്വദേശിയായ യുവതിക്ക് കാനഡയില് ജോലി വാഗ്ദാനം ചെയ്ത് ലക്ഷങ്ങള് തട്ടിയെടുത്ത കേസില് വിദേശ പൗരന് 12 വര്ഷം തടവും 17 ലക്ഷം രൂപ പിഴയും ശിക്ഷ വിധിച്ച് കല്പ്പറ്റ ചീഫ് ജുഡീഷ്യല് മജിസ്ട്രേറ്റ് കോടതി. നൈജീരിയക്കാരനായ ഇക്കെണ്ണ മോസസിനെ (28)യാണ് ശിക്ഷിച്ചത്. വിദേശ പൗരന് സൈബര് തട്ടിപ്പ് കേസില് സംസ്ഥാനത്ത് ശിക്ഷിക്കപ്പെടുന്നത് അപൂര്വ സംഭവമാണെന്ന് ചൂണ്ടിക്കാണിക്കപ്പെടുന്നു. കാനഡയില് മെഡിക്കല് കോഡറില് ജോലി വാങ്ങി നല്കാമെന്ന് പറഞ്ഞാണ് കാനഡ, യുകെ രാജ്യങ്ങളുടെ മൊബൈല് നമ്പര് വഴി ബന്ധപ്പെട്ട് 18 ലക്ഷം രൂപ ഇയാള് തട്ടിയെടുത്തത്. 2023 ഡിസംബറില് ബെംഗളൂരുവില് നിന്നും വയനാട് സൈബര് പൊലീസാണ് ഇയാളെ പിടികൂടിയത്.
ജോലി നല്കാമെന്ന് വിശ്വസിപ്പിച്ച് ചതിച്ചതിന് അഞ്ചു വര്ഷം, കാനഡ എമ്പസിയുടെ വ്യാജ വിസയടക്കമുള്ള രേഖകള് നിര്മ്മിച്ചതിന് അഞ്ചു വര്ഷം, വ്യാജ രേഖകള് അസ്സല് ആണ് എന്ന് തെറ്റിദ്ധരിപ്പിച്ച് പരാതിക്കാരിക്ക് അയച്ചു നല്കിയതിന് രണ്ട് വര്ഷം എന്നിങ്ങനെയാണ് ശിക്ഷ വിധിച്ചത്. പിഴത്തുക പരാതിക്കാരിക്ക് നല്കാനും കോടതി നിര്ദേശിച്ചു.
