ന്യൂദല്ഹി: ജര്മ്മനിയില് നിന്നും ടൈഫൂണ് എന്ന 40 യുദ്ധജെറ്റുകള് വാങ്ങാനുള്ള തുര്ക്കി പ്രസിഡന്റ് എര്ദോഗാന്റെ നീക്കത്തെ ‘ഇസ്രയേലിന്റെ വലിയ തലവേദന’ എന്നാണ് ഒരു ഉന്നത ഇസ്രയേലി ഉദ്യോഗസ്ഥന് പ്രതികരിച്ചത്. ഇറാനും മറ്റ് ഇസ്ലാമിക രാജ്യങ്ങലും ഇസ്രയേലും ഉള്പ്പെടുന്ന മധ്യപൂര്വ്വ ദേശത്തെ ആയുധശക്തിയിലും അധികാരത്തിലും നിലനിന്നിരുന്ന സന്തുലിതാവസ്ഥ ഇല്ലാതാക്കുന്ന നടപടി എന്നാണ് ഇസ്രയേല് മാധ്യമങ്ങളും എര്ദോഗാന്റെ ഈ നീക്കത്തെ വിശേഷിപ്പിക്കുന്നത്. ഇപ്പോള് ഭീഷണിയല്ലെങ്കിലും നിരന്തരം ആയുധങ്ങള് വാങ്ങിക്കൂട്ടുന്ന എര്ദോഗാന് ഭാവിയില് ഭീഷണിയാകുമെന്ന് തന്നെയാണ് ഇസ്രയേല് വിലയിരുത്തുന്നത്.
എര്ദോഗാന് ജര്മ്മനിയില് നിന്നും ടൈഫൂണ് എന്ന 40 യൂറോ ഫൈറ്റര് ജെറ്റുകള് വാങ്ങുന്നതില് ഏറ്റവും കൂടുതല് അസ്വസ്ഥത പ്രകടിപ്പിക്കുന്നത് ഇസ്രയേലാണ്. ടൈഫൂണ് ഒരു സ്റ്റെല്ത് ജെറ്റാണ്. റഡാറുകള്ക്കോ ഇന്ഫ്രാറെഡ് സെന്സറുകള്ക്കോ മറ്റ് ട്രാക്കിംഗ് സംവിധാനങ്ങള്ക്കോ പിടികൊടുക്കാതെ ആകാശത്ത് പതിയിരിക്കാനുള്ള ശേഷിയുള്ള യുദ്ധവിമാനങ്ങളാണ് സ്റ്റെല്ത് ജെറ്റുകള്.ടൈഫൂണ് എന്ന ജര്മ്മനിയുടെ സ്റ്റെല്ത് ജെറ്റിന് തുല്യമാണ് ഇസ്രയേലിന്റെ എഫ് 35 എങ്കിലും, ടൈഫൂണിന് യുദ്ധമേഖലയില് കൂടുതല് കഴിവുകള് പ്രകടിപ്പിക്കാന് കഴിവുണ്ട്. ഇതാണ് ഇസ്രയേലിനെ അസ്വസ്ഥമാക്കുന്നത്. ഇസ്രയേലും ഇറാനും മറ്റ് ഇസ്ലാമിക രാജ്യങ്ങളും ഉള്പ്പെടുന്ന മധ്യപൂര്വ്വദേശത്തെ ആയുധശക്തിയുടെ സന്തുലിതാവസ്ഥയുടെ താളം തെറ്റിക്കുന്നതാണ് തുര്ക്കിയുടെ ഈ ആയുധ ഇടപാടെന്നാണ് ഇസ്രയേലിന്റെ വിലയിരുത്തല്.
തുര്ക്കി പ്രസിഡന്റ് എര്ദോഗാന് എന്ന യുദ്ധദാഹി ലോകത്തെ ശക്തമായ ആയുധങ്ങള് വാങ്ങിക്കൂട്ടുന്നതില് ആര്ത്തിയുള്ള വ്യക്തിയാണ്. നല്ല നല്ല ആയുധക്കമ്പനികളുമായി കരാറുണ്ടാക്കുക, പറ്റുമെങ്കില് അവ പണം കൊടുത്ത് സ്വന്തമാക്കുക എന്നതും എര്ദോഗാന്റെ വിനോദമാണ്. കാരണം യുദ്ധവും ഭീകരവാദവും ഇല്ലാതെ എര്ദോഗാന് ജീവിക്കാന് കഴിയില്ല.
വിശ്വസിക്കാന് കൊള്ളാത്ത ഒരു രാജ്യവും നേതാവുമാണ് എര്ദോഗാന്. സ്വന്തം നേട്ടത്തിനും മതത്തിനും വേണ്ടി ഏത് ചെകുത്താനുമായും കൂട്ടുകൂടുന്ന നേതാവ്. റഷ്യയോട് കൂട്ടുകൂടിക്കൊണ്ട് തന്നെ അമേരിക്കയുടെ തോളില് കയ്യിട്ട് റഷ്യയ്ക്കെതിരെ ആയുധം നല്കും. ഇസ്ലാമിക് സ്റ്റേറ്റിന് എതിരെന്ന് പരസ്യനിലപാട് എടുക്കുമ്പോള് പോലും സിറിയയിലെ ഭരണാധികാരിയെവീഴ്ത്താനും കുര്ദ്ദുകളെ തുരത്താനും ഇസ്ലാമിക് സ്റ്റേറ്റിനെ ഉപയോഗിച്ച നേതാവാണ് എര്ദോഗാന്. ട്രംപ് നിര്ദേശിച്ചതനുസരിച്ച് ഇറാനെതിരെ ഇസ്രയേലിന് വേണ്ടി ചാരപ്രവര്ത്തനം നടത്താന് സ്വന്തം രഹസ്യപ്പൊലീസുള്ളവരെ പറഞ്ഞയച്ചിട്ടുണ്ട് എര്ദോഗാന്. അതേ സമയം ഇസ്രയേലിനെതിരെ കടുത്ത വെറുപ്പുള്ള നേതാവാണ് എര്ദോഗാന്. അതിനാല് തന്നെ എര്ദോഗാന് ശക്തമായ ആയുധങ്ങള് കൈവശം വെയ്ക്കുന്നത് അപകടമാണെന്ന് ഇസ്രയേല് കരുതുന്നു.
തുര്ക്കി എഫ് 35 അമേരിക്കയോട് ചോദിച്ചിരുന്നു. പക്ഷെ ഇസ്രയേലും ഇന്ത്യയും ഇതിനെ എതിര്ത്തതിനാലും കൂടെനില്ക്കുന്നയാളാണെങ്കിലും വിശ്വസിക്കാന് കൊള്ളാത്തവനാണെന്ന് ട്രംപിന് അറിയാവുന്നതിനാലും ട്രംപ് ഈ യുദ്ധജെറ്റ് എര്ദോഗാന് നല്കിയിരുന്നില്ല.
