കണ്ണൂര്: സൗമ്യ വധക്കേസ് പ്രതി ഗോവിന്ദച്ചാമി (ചാർളി തോമസ്) ജയില് ചാടി. കണ്ണൂര് സെന്ട്രല് ജയിലില് നിന്നാണ് ചാടിയത്. ഇന്ന് പുലർച്ചെയാണ് വിവരം അറിയുന്നത്. പരിശോധനയ്ക്കായി ഉദ്യോഗസ്ഥർ എത്തിയപ്പോൾ ഗോവിന്ദച്ചാമി സെല്ലില് ഉണ്ടായിരുന്നില്ല. രാത്രിയാവാം ജയിൽ ചാടിയതെന്നാണ് കരുതുന്നത്. ഗോവിന്ദച്ചാമിക്ക് പുറത്ത് നിന്നും സഹായം ലഭിച്ചെന്നാണ് സൂചന.
ജയിൽചാട്ടത്തിൽ ജയില് മേധാവി റിപ്പോര്ട്ട് തേടി. ഗോവിന്ദച്ചാമിക്കായി പൊലീസ് വ്യാപക തിരച്ചില് ആരംഭിച്ചിട്ടുണ്ട്. ട്രെയിന്, റെയില്വേ സ്റ്റേഷന് കേന്ദ്രീകരിച്ച് ശക്തമായ അന്വേഷണമാണ് നടക്കുന്നത്. അതീവ സുരക്ഷാ ജയില് ഉള്ള പത്താം ബ്ലോക്കില് നിന്നാണ് ഗോവിന്ദച്ചാമി ചാടി പ്പോയത്.
ഗോവിന്ദച്ചാമിയെക്കുറിച്ച് വിവരം ലഭിക്കുന്നവർ 9446899506 എന്ന നമ്പറില് അറിയിക്കാൻ നിർദേശമുണ്ട്. ഒരു കൈമാത്രമാണ് ഗോവിന്ദച്ചാമിക്കുള്ളത്. സൗമ്യാ വധക്കേസില് ഗോവിന്ദച്ചാമിക്ക് ആദ്യം വധശിക്ഷ വിധിച്ചിരുന്നു. പിന്നീട് ശിക്ഷ ജീവപര്യന്തമായി കുറയ്ക്കുകയായിരുന്നു.
