ജോര്‍ജിയ: ആഗോള ചെസ് ഫെഡറേഷനായ ഫിഡെ ലോക വനിതാ ചെസ് മത്സരത്തില്‍ ആദ്യമായി ഒരു ഇന്ത്യന്‍ പെണ്‍കുട്ടി ഫൈനലില്‍ പ്രവേശിച്ചു. ദിവ്യ ദേശ്മുഖ് എന്ന 19 കാരി ഒന്നാം നമ്പര്‍ താരമായ ചൈനയുടെ ടാന്‍ സോംഗിയെയാണ് സെമിഫൈനല്‍ മത്സരത്തില്‍ തോല്‍പിച്ചത്. സെമിയിലെ ആദ്യ മത്സരം ചൊവ്വാഴ്ച സമനിലയില്‍ പിരിഞ്ഞതിനെ തുടര്‍ന്ന് ബുധനാഴ്ച നടന്ന രണ്ടാമത്തെ നിര്‍ണ്ണായക മത്സരം ദിവ്യദേശ് മുഖ് വിജയിക്കുകയായിരുന്നു.
ഭാരതത്തിന്റെ ചെസ് ചരിത്രത്തില്‍ ഇതാദ്യമായാണ് ഒരു പെണ്‍കുട്ടി ഫിഡെ ലോക വനിതാ ചെസ്സിന്റെ ഫൈനലില്‍ പ്രവേശിക്കുന്നത്. ഇപ്പോഴത്തെ ലോക വനിതാ ചെസ് ചാമ്പ്യനെ നേരിടാനുള്ള കാന്‍ഡിഡേറ്റ് ടൂര്‍ണ്ണമെന്‍റിലേക്ക് ഇതാദ്യമായി ഒരു ഇന്ത്യന്‍ വനിത മത്സരിക്കാന്‍ യോഗ്യത നേടുക കൂടിയാണ്.
വെറും 19 വയസ്സുള്ള ദിവ്യ ദേശ്മുഖിനെ ഇതോടെ ലോകം മുഴുവന്‍ ഗൂഗിളില്‍ തിരയുകയാണ്. ലോക വനിതാ ചെസ്സില്‍ ഇത്രയും ചെറിയ പ്രായത്തില്‍ ഫൈനലില്‍ പ്രവേശിക്കുന്ന താരമായതും ലോകത്തിന് അത്ഭുതമായിരിക്കുകയാണ്. ചതുരംഗത്തില്‍ ഇന്ത്യയുടെ അപൂര്‍വ്വ കുതിപ്പിന് മറ്റൊരു ഉദാഹരണം കൂടിയാണ് ദിവ്യ ദേശ്മുഖിന്റെ വിജയം.
മഹാരാഷ്‌ട്രയിലെ നാഗ് പൂര്‍ സ്വദേശിയാണ് ദിവ്യ ദേശ് മുഖ്. ചെസ്സില്‍ റാപിഡും ബ്ലിറ്റ്സും ക്ലാസിക് ചെസും ഒരു പോലെ കൈകാര്യം ചെയ്യുന്ന താരമാണ്. ലോകറാങ്കിംഗ് 908 ആണ്. ഇന്ത്യയുടെ 21ാം വനിതാ ഗ്രാന്‍റ് മാസ്റ്ററാണ്. 2021ലാണ് ഇവര്‍ ഗ്രാന്‍റ് മാസ്റ്റര്‍ പട്ടം നേടിയത്. 2500 ആണ് കൗമാരതാരത്തിന്റെ ഇഎല്‍ഒ റേറ്റിംഗ്. ജൂണില്‍ ലണ്ടനില്‍ നടന്ന ലോക ബ്ലിറ്റ്സ് ചെസ്സില്‍ ലോക ഒന്നാം നമ്പര്‍ താരം ചൈനയുടെ ഹൂ യിഫാനെ അട്ടമറിച്ച ദിവ്യ ദേശ്മുഖിനെ പ്രധാനമന്ത്രി മോദി അഭിനന്ദിച്ചിരുന്നു.
മറ്റൊരു ഇന്ത്യന്‍ താരമായ കൊനേരു ഹംപിയും മറ്റൊരു സെമിയില്‍ ജയിക്കേണ്ടതായിരുന്നു. പക്ഷെ ആദ്യഘട്ടത്തില്‍ കളിയില്‍ കിട്ടിയ മേല്‍ക്കൈ മുതലാക്കുന്നതില്‍ കൊനേരു ഹംപി പരാജയപ്പെട്ടു. ഇതോടെ കൊനേരു ഹംപിയും ചൈനയുടെ ലെയ് ടിംഗ്ജിയും തമ്മിലുള്ള മത്സരം രണ്ടാം വട്ടവും സമനിലയില്‍ പിരിഞ്ഞു. ഇരുവരും തമ്മിലുള്ള ടൈബ്രേക്കര്‍ മത്സരം നാളെ നടക്കും. ഹംപി കൂടി ഫൈനലില്‍ എത്തിയാല്‍ അത് ഇന്ത്യയ്‌ക്ക് അവിസ്മരണീയ നേട്ടമാകും.
