ന്യൂദല്ഹി: ആരാണ് അവര്? എന്താണ് അവരുടെ ആധികാരികത? ചോദിക്കുന്നത് മുന് കേന്ദ്രമന്ത്രിയും തിരുവനന്തപുരം എംപിയും മുതിര്ന്ന കോണ്ഗ്രസ് നേതാവുമായ ശശി തരൂര്. പരിഹസിച്ചത് കോണ്ഗ്രസ് നേതാക്കളായ കെ. മുരളീധരനെയും രാജ്മോഹന് ഉണ്ണിത്താനെയും.കഴിഞ്ഞ ദിവസം ഇവര് തരൂരിനെതിരെ തിരിയുകയും തരൂര് തങ്ങള്ക്കൊപ്പമില്ലെന്നും മറ്റും പറയുകയും ചെയ്തിരുന്നു. ഇന്നലെ ദല്ഹിയില് മാധ്യമങ്ങളെ കണ്ട തരൂര് ഇതിനാണ് മറുപടി നല്കിയത്.
എനിക്കെതിരെ പറഞ്ഞ അവര് ആരാണ്. എന്താണ് അവരുടെ ആധികാരികത. തരൂര് മാധ്യമ പ്രവര്ത്തകരോട് ചോദിച്ചു. ‘ഇങ്ങനൊക്കെ പറയുന്നവര്ക്ക് അതിനുള്ള അടിത്തറ ഉണ്ടായിരിക്കണം. ആരാണ് ഇതൊക്കെ പറയുന്നത്? പാര്ട്ടിയില് അവരുടെ സ്ഥാനമെന്താണ്? ഇക്കാര്യങ്ങള് അറിയാന് എനിക്ക് താല്പര്യമുണ്ട്. അവരുടെ പെരുമാറ്റത്തേക്കുറിച്ച് വിശദീകരിക്കാന് എനിക്ക് കഴിയില്ല. അത് അവരോടു തന്നെ ചോദിക്കണം, തരൂര് പറഞ്ഞു.
തരൂരിനെ തിരുവനന്തപുരത്തെ ഒരു പാര്ട്ടി പരിപാടിയിലും പങ്കെടുപ്പിക്കില്ലെന്നും അദ്ദേഹം തങ്ങള്ക്ക് ഒപ്പം ഇല്ലെന്നുമാണ് കെ. മുരളീധരന് പറഞ്ഞത്. തരൂരിന്റെ കാര്യം കേരളത്തിലെ കോണ്ഗ്രസ് വിട്ടതാണ്. അദ്ദേഹത്തിനെതിരേ നടപടി വേണോ വേണ്ടയോ എന്ന് ദേശീയ നേതൃത്വം തീരുമാനിക്കട്ടെ എന്നും മുരളീധരന് പറഞ്ഞിരുന്നു.
തരൂര് പാര്ട്ടി വിടുന്നതാണ് നല്ലതെന്നാണ് രാജ്മോഹന് ഉണ്ണിത്താന് എംപിയും പറഞ്ഞത്. പാര്ട്ടി പുറത്താക്കുന്നതുവരെ അദ്ദേഹം കാത്തിരിക്കേണ്ടതില്ല, അത് സംഭവിക്കില്ല. അദ്ദേഹം സ്വയം പുറത്തുപോകുന്നതാണ് നല്ലത്, തരൂരിനെ കോണ്ഗ്രസ് പാര്ലമെന്ററി പാര്ട്ടി യോഗങ്ങളില് നിന്ന് വിലക്കണമെന്നും ഉണ്ണിത്താന് ആവശ്യപ്പെട്ടിരുന്നു.
