ആലപ്പുഴ : മുന് മുഖ്യമന്ത്രി വി എസ് അച്യുതാനന്ദന്റെ ഭൗതികദേഹം ആലപ്പുഴ കടപ്പുറത്തെ റിക്രിയേഷന് ഗ്രൗണ്ടില് ബുധനാഴ്ച്ച രാവിലെ 11 മണി മുതല് പൊതുദര്ശനത്തിന് വയ്ക്കും. സംസ്കാരച്ചടങ്ങുകളുമായി ബന്ധപ്പെട്ട ക്രമീകരണങ്ങള് വിലയിരുത്തുന്നതിന് മന്ത്രി സജി ചെറിയാന്റെ നേതൃത്വത്തില് ജില്ലാകളക്ടറുടെ ചേമ്പറില് ചേര്ന്ന അടിയന്തര യോഗത്തിലാണ് തീരുമാനം.
ചൊവ്വാഴ്ച ഉച്ചയോടെ തിരുവനന്തപുരത്ത് നിന്ന് ദേശീയപാത 66 വഴി ആലപ്പുഴയിലേക്ക് മൃതദേഹം എത്തിക്കും. ഭൗതികദേഹം രാത്രി 9 മണിയോടുകൂടി ആലപ്പുഴയിലെ വീട്ടില് എത്തിക്കും. ബുധനാഴ്ച ാവിലെ 9 മണിവരെ വീട്ടിലും തുടര്ന്ന് 10 മണിയോടെ സി പി എം ജില്ലാ കമ്മിറ്റി ഓഫീസിലും പൊതുദര്ശനത്തിന് വയ്ക്കും.
11 മണി മുതല് വൈകിട്ട് ഉച്ച തിരിഞ്ഞ് 3 മണിവരെ ആലപ്പുഴ കടപ്പുറത്തെ റിക്രിയേഷന് ഗ്രൗണ്ടില് പ്രത്യേകം ഒരുക്കിയ പന്തലില് പൊതുജനങ്ങള്ക്ക് പൊതുദര്ശനത്തിന് സൗകര്യം ഒരുക്കിയിട്ടുണ്ട്. പൊതുദര്ശനത്തിന് ശേഷം നാല് മണിയോടെയാവും വലിയ ചുടുകാടില് ഔദ്യോഗിക ചടങ്ങുകളോടെ സംസ്കാരം.
പൊതുദര്ശനത്തിന് സൗകര്യം ഒരുക്കാനായി സഞ്ചാരികള്ക്ക് ബീച്ചില് നിയന്ത്രണവും നഗരത്തില് ഗതാഗതക്രമീകരണങ്ങളും ഏര്പ്പെടുത്തും. പൊതുദര്ശനത്തിനെത്തുന്നവര്ക്കുള്ള വാഹനപാര്ക്കിംഗ് ബീച്ചിലെ മേല്പ്പാലത്തിന് അടിവശമാണ്.
