ആലപ്പുഴ: അമ്മയും പെണ്മക്കളും കൈകുഞ്ഞുമുള്പ്പെടുന്ന കുടുംബത്തെ വീട്ടില് നിന്നിറക്കി വിട്ട് സിപിഎം. സിപിഎം പാലമേല് ലോക്കല് സെക്രട്ടറിയുടെ നേതൃത്വത്തിലാണ് വീട് പൂട്ടി കൊടി കുത്തിയത്.
ഇഎംഎസ് ഭവന പദ്ധതിയില് ലഭിച്ച വീട് വിറ്റതാണ് കാരണമെന്ന് സിപിഎം ലോക്കല് സെക്രട്ടറി പറഞ്ഞു. ആദിക്കാട്ട് കുളങ്ങര സ്വദേശി അര്ഷാദ്, ഭാര്യ റജൂല, രണ്ട് മക്കളുമടങ്ങുന്ന കുടുംബത്തെയാണ് വീട്ടില് നിന്നിറക്കി വിട്ടത്. ഇതിന് പിന്നാലെ പൊലീസ് സ്ഥലത്തെത്തി വീട് തുറന്ന് നല്കി.
വീടിന്റെ മുന് ഉടമസ്ഥനുമായി ബന്ധപ്പെട്ട തര്ക്കം മൂലമാണ് മൂന്ന് ദിവസം മുമ്പ് താമസത്തിന് എത്തിയ കുടുംബത്തെ സി പി എം പ്രാദേശിക നേതൃത്വം പെരുവഴിയില് ഇറക്കി വിട്ടത്. 2006 ല് പട്ടയ ഭൂമിയായി നല്കിയ സ്ഥലം ഉടമസ്ഥന് കൈമാറ്റം ചെയ്തത് തങ്ങള് തടഞ്ഞതാണെന്ന് സംഭവത്തില് സിപിഎം പ്രാദേശിക നേതൃത്വം വിശദീകരിക്കുന്നു.
രാത്രി വീട്ടില് കഴിയാനാകില്ലെന്നും സിപിഎം ഭീഷണി നിലനില്ക്കുന്നുണ്ടെന്നും കുടുംബം പൊലീസിനോട് പറഞ്ഞു. ഈ സാഹചര്യത്തില് കുടുംബം ബന്ധുവീട്ടിലേക്ക് മാറി. സംഭവത്തില് പൊലീസ് കേസ് രജിസ്റ്റര് ചെയ്തു.
