കൊല്ലം: പട്ടാഴി പൊരിക്കുന്നി മലനടയിലെ ഊരാളി അപ്പൂപ്പന് കാവ് സങ്കല്പ്പത്തിനടുത്തുള്ള വിളക്കുകള് കൊളുത്തുന്ന കല്ലുകളും മുത്തുക്കുടകളും മറിച്ചിടുകയും നശിപ്പിക്കുകയും ചെയ്ത നിലയില് .മലനടയില് നിരത്തി വച്ചിരിക്കുന്ന ഒട്ടുമിക്ക കല് വിളക്കുകളും മറിച്ചിട്ട നിലയിലാണ് കര്ക്കടകം ഒന്നിന് രാവിലെ വിളക്ക് കൊളുത്താന് എത്തിയ മലയിലെ ഊരാളി, ജന്മി തുടങ്ങിയവര് കണ്ടത് .
മുന്വശത്ത് സ്ഥാപിച്ചിരുന്ന കുട പൊട്ടിച്ച രീതിയിലും വിളക്ക് തള്ളിയിട്ട നിലയിലും കാണപ്പെട്ടു. കുന്നിക്കോട് പൊലീസ് സ്ഥലത്തെത്തി അന്വേഷണം നടത്തി. സംഭവത്തില് കേസെടുത്തു.
ദേവീക്ഷേത്രത്തില് നിന്നും ഏകദേശം ഒരു കിലോമീറ്റര് അകലെയുള്ള ഒറ്റപ്പെട്ട സ്ഥലത്താണ് പുലിക്കുന്നി മലനട സ്ഥിതി ചെയ്യുന്നത്. പട്ടാഴി ദേവീക്ഷേത്രത്തിലെ ക്ഷേത്ര ആചാരങ്ങളുമായി ബന്ധപ്പെട്ട മലനടയില് ക്ഷേത്രത്തില് വരുന്ന ഭക്തര് എത്താറുണ്ട് .
മലകളും തോട്ടങ്ങളും ഉള്ള ആ പ്രദേശത്ത് സാമൂഹ്യവിരുദ്ധ ശല്യം രൂക്ഷമാണ്. മദ്യപ സംഘങ്ങളും ചീട്ടു കളിക്കാരും പ്രദേശം താവളം ആക്കിയിട്ട് നാളുകള് ഏറെയായി എന്ന് പ്രദേശവാസികള് പറഞ്ഞു.
എന്നാല് മലനടയില് ഉണ്ടായ സംഭവം ദേവീക്ഷേത്ര ഉപദേശക സമിതി ലഘൂകരിച്ച് കാണുകയാണെന്ന് ബിജെപി ആരോപിച്ചു. ഇതിന് ഉത്തരവാദികള് നിലവിലുള്ള ജന്മിയും ഊരാളിയും തമ്മിലുള്ള ആഭ്യന്തര പ്രശ്നമാണ് എന്ന് വരുത്തി തീര്ക്കാനാണ് ശ്രമമെന്നാണ് ആരോപണം. മലങ്കാവില് ഉണ്ടായ ആക്രമണം സാമൂഹ്യവിരുദ്ധ ശല്യമല്ലെന്നും കൃത്യമായി ആസൂത്രിതമായി നടപ്പിലാക്കിയ ആക്രമണം ആണെന്നും ബിജെപി നേതാക്കള് പറഞ്ഞു.ഇതേ തുടര്ന്ന് വൈകുന്നേരം പട്ടാഴി മാര്ക്കറ്റ് ജംഗ്ഷനില് നിന്നും പട്ടാഴി ദേവീക്ഷേത്ര ഗോപുര നടയിലേക്ക് ബിജെപിയുടെ നേതൃത്വത്തില് പ്രതിഷേധ പ്രകടനവും ധാരണയും നടത്തി. ധര്ണ ബിജെപി പത്തനാപുരം മണ്ഡലം പ്രസിഡന്റ് രതീഷ് കൂളോര് ഉദ്ഘാടനം ചെയ്തു. കര്ഷകമോര്ച്ച സംസ്ഥാന ഉപാധ്യക്ഷന് സുഭാഷ് പട്ടാഴി മുഖ്യപ്രഭാഷണം നടത്തി. ബിജെപി നേതാക്കളായ മനോമി രാജീവന് പിള്ള ,രതീഷ് കുമാര്, വിജേഷ് കുമാര് തുടങ്ങിയവര് സംസാരിച്ചു.
അതേസമയം ക്ഷേത്ര സ്വത്തുക്കള് കയ്യേറി മലങ്കാവ് പോലെയുള്ള സ്ഥലങ്ങളില് ധാരാളം കുടിയേറ്റങ്ങളും കയ്യേറ്റങ്ങളും നടന്നിട്ടുണ്ടെന്നും ഇതിനെതിരെ നിയമനടപടിക്ക് ഒരുങ്ങുകയാണെന്നും ഹിന്ദു ഐക്യവേദി സംസ്ഥാന ജനറല് സെക്രട്ടറി മഞ്ഞപ്പാറ സുരേഷ് സംസ്ഥാന സമിതി അംഗം തലവൂര് ഗോപാലകൃഷ്ണന്, താലൂക്ക് ട്രഷറര് രതീഷ് ജി എന്നിവര് പറഞ്ഞു.
