കൊല്ലം: വിദ്യാര്ത്ഥി വൈദ്യുതാഘാതമേറ്റ് മരിച്ച തേവലക്കര ബോയ്സ് ഹൈസ്കൂള് സിപിഎം ജില്ലാകമ്മിറ്റിയുടെ നിയന്ത്രണത്തിലുള്ളത്.പാര്ട്ടി മൈനാഗപ്പള്ളി ലോക്കല്സെക്രട്ടറി തുളസീധരന്പിള്ളയാണ് സ്കൂള് മാനേജര്. ചവറ ലോക്കല് സെക്രട്ടറി ഗോവിന്ദപ്പിള്ളയാണ് സ്കൂളിന്റെ പ്രസിഡന്റ്.
സിപിഎം ജില്ലാ കമ്മിറ്റിയാണ് പ്രസിഡന്റിനെയും സ്കൂള് മാനേജരെയും നിശ്ചയിക്കുന്നത്. അഞ്ചുവര്ഷമാണ് മാനേജരുടെയും പ്രസിഡന്റിന്റെയും കാലാവധി. പിന്നീട് പുതിയ ഭാരവാഹികളെ പാര്ട്ടി ജില്ലാകമ്മിറ്റി കൂടി തീരുമാനിക്കുകയാണ് പതിവ്.
ഈ ഭരണസമിതിക്ക് മുന്പ് സ്കൂള്മാനേജര് ആയിരുന്നത് ഇപ്പോള് സിപിഎം ഏരിയ സെക്രട്ടറിയും ജില്ലാ പഞ്ചായത്ത് പ്രസിഡന്റുമായ പി.കെ ഗോപനാണ്. ഗോപന് സ്കൂള് മാനേജരായ കാലത്താണ് അനധികൃതമായി വൈദ്യുതിയും വലിച്ചതും ഷെഡ് നിര്മ്മിച്ചതും.
അതിനിടെ, എട്ടാം ക്ലാസ് വിദ്യാര്ത്ഥി മിഥുന് വൈദ്യുതാഘാതമേറ്റ് മരിച്ച സംഭവത്തില് വ്യാപക പ്രതിഷേധമാണ് നടക്കുന്നത്. സ്കൂളിലേക്ക് ബി ജെ പിയും യുവമോര്ച്ചയും പ്രകടനം നടത്തി. ബി ജെ പി വിദ്യാഭ്യാസ മന്ത്രി വി ശിവന്കുട്ടിയുടെ കോലം കത്തിച്ചു.
പടിഞ്ഞാറെ കല്ലട മിഥുന് ഭവനത്തില് മനു-സുജ ദമ്പതികളുടെ മകനാണ് മരിച്ച മിഥുന്.വ്യാഴാഴ്ച രാവിലെ എട്ടരയോടെയാണ് സംഭവം.സ്കൂള് ഗ്രൗണ്ടില് കുട്ടികള് കളിക്കുന്നതിലൂടെ മിഥുന്റെ ചെരുപ്പ് ലൈനിന് തൊട്ടുതാഴെയുള്ള സൈക്കിള് ഷെഡിന് മുകളില് തെറിച്ച് വീണു. സ്കൂള് കെട്ടിടത്തോട് ചേര്ന്നുള്ള ഷെഡിന് മുകളില് കയറിയ മിഥുന് കാല്വഴുതി വൈദ്യുതിലൈനില് വീഴുകയായിരുന്നു. അബോധാവസ്ഥയില് ലൈന്കമ്പിയില് കിടന്ന കുട്ടിയെ തടിബഞ്ച് വച്ച് തട്ടി വൈദ്യുതിയില് നിന്നും അടര്ത്തി.നാട്ടുകാരും സ്കൂള് അധികൃതരും ചേര്ന്ന് ശാസ്താംകോട്ട താലൂക്ക് ആശുപത്രിയില് എത്തിച്ചെങ്കിലും രക്ഷിക്കാനായില്ല.
