വയനാട് : പ്ലസ് ടു വിദ്യാര്ഥിനിയെ മദ്യം നല്കി പീഡിപ്പിച്ച രണ്ട് യുവാക്കള് പിടിയില്.മക്കിമല സ്വദേശികളായ കാപ്പിക്കുഴിയില് ആഷിക്ക് , ആറാം നമ്പര് ഉന്നതിയിലെ ജയരാജന് എന്നിവരാണ് അറസ്റ്റിലായത്.
തലപ്പുഴ പൊലീസ് സ്റ്റേഷന് പരിധിയിലാണ് പീഡനം.പ്രായപൂര്ത്തിയാകാത്ത പെണ്കുട്ടിക്ക് നേരെയാണ് അതിക്രമം. ഈ മാസം 13നാണ് കേസിനാധാരമായ സംഭവം.
മാതാപിതാക്കള് വീട്ടിലില്ലാത്ത സമയം വീട്ടില് അതിക്രമിച്ചു കയറി പെണ്കുട്ടിയെ ഒന്നാം പ്രതിയായ ആഷിക് തട്ടിക്കൊണ്ടുപോയി. ശേഷം രണ്ടാം പ്രതിയായ ജയരാജിന്റെ സ്ഥാപനത്തിലെത്തി മദ്യം നല്കി ക്രൂരമായി പീഡിപ്പിച്ചു. മദ്യം കുടിക്കാന് വിസമ്മതിച്ച വിദ്യാര്ഥിനിയെ മര്ദ്ദിച്ചതായും പരാതിയുണ്ട്.
സ്കൂളിലെത്തിയ കുട്ടിയില്നിന്ന് അധ്യാപകരാണ് വിവരങ്ങള് ശേഖരിച്ചത്. തുടര്ന്നാണ് പരാതി നല്കിയത്. പ്രതികള്ക്കെതിരെ പോക്സോ, ബിഎന്എസിലെ വിവിധ വകുപ്പുകള് ചുമത്തി.
