വാഷിങ്ടൺ : ഇന്ത്യയും പാകിസ്ഥാനും തമ്മിലുള്ള സംഘർഷത്തെ അവസാനിപ്പിച്ചത് തന്റെ ശ്രമഫലമാണെന്ന സ്ഥിരം പല്ലവിയുമായി അമേരിക്കൻ പ്രസിഡൻ്റ് ഡൊണാൾഡ് ട്രംപ്. ഇരു രാജ്യങ്ങളും തമ്മിലുള്ള ആണവയുദ്ധം പൊട്ടിപ്പുറപ്പെടുന്നത് തടയുന്നതിൽ താൻ വിജയിച്ചുവെന്നും ട്രംപ് വീണ്ടും അവകാശപ്പെട്ടു. വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം പറഞ്ഞത്.
ഇന്ത്യയും പാകിസ്ഥാനും തമ്മിലുള്ള യുദ്ധം നടന്നിരുന്ന രീതിയിൽ ഒരു ആഴ്ചയ്ക്കുള്ളിൽ ഇരു രാജ്യങ്ങളും തമ്മിൽ ഒരു ആണവയുദ്ധം പൊട്ടിപ്പുറപ്പെടുമായിരുന്നു. എന്നാൽ യുദ്ധങ്ങൾ പരിഹരിക്കുന്നതിൽ ഞങ്ങൾ വിജയിച്ചുവെന്നാണ് ട്രംപ് പറഞ്ഞത്.
എന്നാൽ ഇന്ത്യയും പാകിസ്ഥാനും തമ്മിലുള്ള വെടിനിർത്തൽ അമേരിക്കയുടെ നിർദ്ദേശപ്രകാരമല്ല നടന്നതെന്ന് ഇന്ത്യൻ സർക്കാരും പ്രധാനമന്ത്രി നരേന്ദ്ര മോദിയും വ്യക്തമാക്കിയിട്ടുണ്ട്. പാകിസ്ഥാൻ ഡിജിഎംഒ ഇന്ത്യയുടെ ഡിജിഎംഒയുമായി സംസാരിക്കുകയും വെടിനിർത്തൽ വാഗ്ദാനം ചെയ്യുകയും ചെയ്തുവെന്നതാണ് യാഥാർത്ഥ്യം.
അതേ സമയം ഒരു വശത്ത് ലോകമെമ്പാടും നടക്കുന്ന യുദ്ധങ്ങൾക്കിടയിൽ വെടിനിർത്തലിനും കരാറുകൾക്കും ഡൊണാൾഡ് ട്രംപ് ആവർത്തിച്ച് അംഗീകാരം നേടാൻ ശ്രമിക്കുമ്പോൾ മറുവശത്ത് അമേരിക്ക ഉക്രെയ്നിലേക്ക് ആയുധങ്ങൾ അയയ്ക്കുകയാണ്. വാസ്തവത്തിൽ റഷ്യയുമായുള്ള സംഘർഷത്തിനിടയിൽ തന്റെ ഭരണകൂടം ഉക്രെയ്നിലേക്ക് പാട്രിയറ്റ് വ്യോമ പ്രതിരോധ മിസൈലുകൾ അയയ്ക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് ഞായറാഴ്ച പറഞ്ഞിരുന്നു.
ഉക്രെയ്നിലേക്ക് എത്ര വ്യോമ പ്രതിരോധ മിസൈലുകൾ അയയ്ക്കുമെന്ന് ട്രംപ് പറയാൻ വിസമ്മതിച്ചെങ്കിലും ചില മിസൈലുകൾ അയയ്ക്കുമെന്ന് അദ്ദേഹം പറഞ്ഞിരുന്നു.
