മഴക്കാലത്ത് ഈർപ്പം കൂടുമ്പോൾ, അരിയും ധാന്യങ്ങളും സൂക്ഷിക്കുന്ന പാത്രങ്ങളില് പ്രാണികൾ വരാൻ സാധ്യത വളരെ കൂടുതലാണ്. കറുപ്പ് കലർന്ന തവിട്ടുനിറമുള്ള ഈ പ്രാണികൾ അരിയുടെയും മറ്റ് ധാന്യങ്ങളുടെയും ഉള്ളിൽ മുട്ടയിടുകയും പെരുകുകയും ചെയ്യും. ഇവയെ കൃത്യസമയത്ത് കണ്ടെത്തിയില്ലെങ്കിൽ നല്ല അരി പോലും ഉപയോഗശൂന്യമായി മാറും.
പ്രാണികളുള്ള അരി ഒരു വലിയ ഷീറ്റിലോ പരന്ന പാത്രത്തിലോ നിരത്തി നല്ല വെയിലത്ത് വെക്കുക. വെയിലിന്റെ ചൂടിൽ പ്രാണികൾ അരിയിൽ നിന്ന് പുറത്തേക്ക് പോയിക്കൊള്ളും.
ഉണങ്ങിയ പുതിനയില, വേപ്പില, അല്ലെങ്കിൽ ബിരിയാണിക്ക് ഉപയോഗിക്കുന്ന ബേ ഇല എന്നിവ അരിക്കിടയിൽ ഇട്ടുവെക്കുക. ഈ ഇലകളുടെ രൂക്ഷമായ ഗന്ധം പ്രാണികളെ അകറ്റാൻ സഹായിക്കും. ഗ്രാമ്പൂ ഒരു ചെറിയ തുണിയിൽ കിഴിയാക്കി അരിക്കിടയിൽ വെക്കുകയോ, നേരിട്ട് അരിക്കിടയിൽ വിതറുകയോ ചെയ്യാം. ഗ്രാമ്പൂവിന്റെ മണം പ്രാണികൾക്ക് തീരെ ഇഷ്ടമല്ല.
തൊലികളഞ്ഞ ഒന്നോ രണ്ടോ വെളുത്തുള്ളി അല്ലികൾ അരിയുടെ പാത്രത്തിൽ ഇട്ടു വെക്കുന്നത് പ്രാണികളെ അകറ്റാൻ സഹായിക്കും.
കുറച്ച് കായം (പൊടിയായും കട്ടയായും) അരി സൂക്ഷിക്കുന്ന പാത്രത്തിന്റെ ചുറ്റും വെക്കുന്നത് പ്രാണികളെ അടുപ്പിക്കില്ല.
പ്രാണികൾ വരാതിരിക്കാൻ ചില മുൻകരുതലുകൾ എടുക്കാം. ഇത് ഒരു പരിധി വരെ അവയെ അകറ്റി നിർത്താൻ സഹായിക്കും
അരിയും മറ്റ് ധാന്യങ്ങളും വായു കടക്കാത്ത ഗ്ലാസ്, സ്റ്റീൽ, അല്ലെങ്കിൽ കട്ടിയുള്ള പ്ലാസ്റ്റിക് കണ്ടെയ്നറുകളിൽ സൂക്ഷിക്കുക. സാധാരണ പ്ലാസ്റ്റിക് കവറുകളോ നേരിയ പാത്രങ്ങളോ ആണെങ്കില് അവയിലേക്ക് പ്രാണികൾക്ക് എളുപ്പത്തിൽ തുളച്ച് കയറാൻ സാധിക്കും. കേടായ പാക്കറ്റുകൾ ഒഴിവാക്കുക.
ചെറിയ അളവിൽ വാങ്ങുന്ന അരിയോ ധാന്യങ്ങളോ ഒരു ദിവസത്തെയോ അല്ലെങ്കിൽ 3-4 ദിവസത്തെയോ തണുപ്പിൽ ഫ്രീസറിൽ വെക്കുന്നത് മുട്ടകളെയും ലാർവകളെയും നശിപ്പിക്കാൻ സഹായിക്കും. അതിനുശേഷം സാധാരണ താപനിലയിൽ സൂക്ഷിക്കാം.
അരി സൂക്ഷിക്കുന്ന അറയും പരിസരവും എപ്പോഴും വൃത്തിയായും ഉണങ്ങിയും സൂക്ഷിക്കുക. ഇടയ്ക്കിടെ തുടച്ച് വൃത്തിയാക്കുന്നത് പ്രാണികൾ പെരുകുന്നത് തടയും.
