തിരുവനന്തപുരം: കേന്ദ്രആഭ്യന്തരമന്ത്രി അമിത് ഷാ തലസ്ഥാനത്ത് എത്തി. രാത്രി പത്തുമണിക്ക് തിരുവനന്തപുരം വിമാനത്താവളത്തിലെത്തിയ അദ്ദേഹത്തെ ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറിന്റെ നേതൃത്വത്തില് സ്വീകരിച്ചു. ബിജെപി സംസ്ഥാന കമ്മറ്റി ഓഫീസ് ഉദ്ഘാടനത്തിനായി എത്തിയ അദ്ദേഹം കാല് ലക്ഷം പേരുടെ പൊതുസമ്മേളനത്തില് സംസാരിക്കും. സമ്മേളനത്തില് ഒന്നരലക്ഷം പേര് വെര്ച്വലായി പങ്കെടുക്കും.
ഇന്ന് രാവിലെ 11 മണിക്കാണ് സംസ്ഥാന ഓഫീസ് ഉദ്ഘാടനം. ഓഫീസിലെത്തി പതാക ഉയര്ത്തുന്ന അമിത് ഷാ, ഓഫീസിന് മുന്നില് വൃക്ഷത്തൈ നടും. തുടര്ന്ന് നാട മുറിച്ച് കെട്ടിടത്തില് പ്രവേശിച്ച് വിളക്കുകൊളുത്തി ഓഫീസ് ഉദ്ഘാടനം നിര്വഹിക്കും. ഓഫീസിന്റെ നടുത്തളത്തില് സ്ഥാപിച്ച മുന് സംസ്ഥാന അധ്യക്ഷന് കെ.ജി. മാരാരുടെ അര്ധകായ വെങ്കല പ്രതിമയും ആഭ്യന്തരമന്ത്രി അനാച്ഛാദനം ചെയ്യും. തുടര്ന്ന് പതിനൊന്നരയ്ക്ക് പുത്തരിക്കണ്ടം മൈതാനിയില് നടക്കുന്ന വാര്ഡുതല നേതൃസംഗമം അമിത് ഷാ ഉദ്ഘാടനം ചെയ്യും. തിരുവനന്തപുരം, കൊല്ലം, പത്തനംതിട്ട, ആലപ്പുഴ റവന്യൂ ജില്ലകളിലെ അയ്യായിരം വാര്ഡ് സമിതികളിലെ 25,000 പേരാണ് നേതൃസംഗമത്തിനെത്തുന്നത്. മറ്റു പത്ത് റവന്യൂ ജില്ലകളിലെ അഞ്ചംഗ വാര്ഡ് സമിതി അംഗങ്ങളും പഞ്ചായത്ത് മുതല് ജില്ലാതലം വരെയുള്ള നേതാക്കളും അതാതു പഞ്ചായത്ത് ഏരിയാ തലങ്ങളില് വെര്ച്വലായി തിരുവനന്തപുരം സമ്മേളനത്തിന്റെ ഭാഗമാകും. ഒന്നര ലക്ഷത്തോളം പേരാണ് ഇത്തരത്തില് വെര്ച്വലായി തിരുവനന്തപുരം സമ്മേളനത്തില് പങ്കെടുക്കുന്നത്.
ഉച്ചയ്ക്ക് ശേഷം ബിജെപി സംസ്ഥാന നേതൃയോഗത്തിലും അമിത് ഷാ പങ്കെടുക്കും. തദ്ദേശ സ്വയംഭരണ തെരഞ്ഞെടുപ്പ് മുന്നൊരുക്കങ്ങള് ചര്ച്ച ചെയ്യും. നാലുമണിയോടെ കണ്ണൂരിലേക്ക് തിരിക്കുന്ന ആഭ്യന്തരമന്ത്രി തളിപ്പറമ്പ് രാജരാജേശ്വര ക്ഷേത്രത്തില് ദര്ശനം നടത്തി ദല്ഹിക്ക് മടങ്ങും. പുത്തരിക്കണ്ടം മൈതാനിയില് നടക്കുന്ന വാര്ഡ്തല നേതൃസംഗമത്തോടെ തദ്ദേശ സ്വയംഭരണ തെരഞ്ഞെടുപ്പിനുള്ള പോരാട്ടം ബിജെപി ആരംഭിക്കുകയാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പ്രസ്താവിച്ചു. കേരളത്തിലെ ജനങ്ങള് മാറ്റം ആഗ്രഹിക്കുന്നതായും ആരോഗ്യ വിദ്യാഭ്യാസ മേഖലകളിലടക്കം സംസ്ഥാന സര്ക്കാരിന്റെ അനാസ്ഥമൂലം സംഭവിക്കുന്ന വീഴ്ചകള് ബിജെപി ജനങ്ങളിലേക്ക് എത്തിക്കുമെന്നും ബിജെപി അധ്യക്ഷന് പറഞ്ഞു.
വൈകുന്നേരം അഞ്ചുമണിക്ക് തളിപ്പറമ്പ് ശ്രീ രാജരാജേശ്വര ക്ഷേത്രത്തില് ദര്ശനം നടത്തും. നാലു മണിയോടെ കണ്ണൂര് വിമാനത്താവളത്തില് എത്തും.
ബിജെപി സൗത്ത് ജില്ലാ കമ്മിറ്റിയുടെ നേതൃത്വത്തില് ബിജെപി നേതാക്കളും പ്രവര്ത്തകരും ചേര്ന്ന് സ്വീകരണം നല്കും. തുടര്ന്ന് ചാലോട്, മയ്യില് വഴി തളിപ്പറമ്പിലേക്ക് തിരിക്കും. രാജരാജേശ്വര ക്ഷേത്രദര്ശനം നടത്തിയ ശേഷം തിരിച്ച് ഏഴു മണിയോടെ കണ്ണൂര് വിമാനത്താവളം വഴി ദല്ഹിയിലേക്ക് പോകും.
വാഹനങ്ങള് ഇവിടങ്ങളില് പാര്ക്കുചെയ്യണം
പുത്തരികണ്ടം മൈതാനത്തില് നടക്കുന്ന പൊതുസമ്മേളനത്തില് പങ്കെടുക്കാന് എത്തുന്നവരുടെ വാഹനങ്ങള് കിള്ളിപാലം, അട്ടകുളങ്ങര, എസ്എംവി സ്കൂള് എന്നിവിടങ്ങളില് ആളെ ഇറക്കിയ ശേഷം വലിയ വാഹനങ്ങള് ആറ്റുുകാല്പാര്ക്കിംഗ് ഗ്രൗണ്ട്, ഹോമിയോ കോളജ് പാര്ക്കിംഗ് ഗ്രൗണ്ട്, ചാല സ്കൂള് ഗ്രൗണ്ട് എന്നിവിടങ്ങളിലും, ചെറിയ വാഹനങ്ങള് പവര് ഹൗസ്സ് റോഡിലെ ലോറി പാര്ക്കിംഗ് ഗ്രൗണ്ട്, ഫോര്ട്ട് സ്കൂള് ഗ്രൗണ്ട്, മാഞ്ഞാലിക്കുളം ഗ്രൗണ്ടിലും, അട്ടക്കുളങ്ങര ഗവ. സെന്ട്രല് സ്കൂള് ഗ്രൗണ്ട് എന്നിവിടങ്ങളിലും പാര്ക്ക്ചെയ്യണം.
