തിരുവനന്തപുരം: പി. കേശവദേവ് സ്മാരക ട്രസ്റ്റ് നല്കിവരുന്ന പി. കേശവദേവ് സാഹിത്യപുരസ്കാരം ഡോ. ശശിതരൂര് എംപിക്കും ഡയബ്സ്ക്രീന് പുരസ്കാരം ഡയബറ്റോളജിസ്റ്റായ ഡോ. ബന്ഷി സാബുവിനും നല്കും. എഴുത്തുകാരനും രാഷ്ട്രതന്ത്രജ്ഞനുമായ ഡോ. ശശിതരൂരിന്റെ സാഹിത്യ സംഭാവനകള് കണക്കിലെടുത്താണ് പുരസ്കാരം നല്കുന്നത്.
പൊതു ആരോഗ്യ വിദ്യാഭ്യാസ മേഖലയിലെ ദീര്ഘകാല പരിശ്രമങ്ങള്ക്കും പ്രമേഹ പ്രതിരോധവും നിയന്ത്രണവും സംബന്ധിച്ചുള്ള ജനജാഗ്രതക്ക് നല്കിയ സംഭാവനകളും കണക്കിലെടുത്താണ് ഡോ. ബന്ഷിക്ക് പുരസ്കാരം നല്കുന്നത്. 50,000 രൂപയും ബി.ഡി. ദത്തന് രൂപകല്പന ചെയ്ത ശില്പവും പ്രശസ്തിപത്രവും അടങ്ങുന്നതാണ് ഓരോ പുരസ്കാരവും. 27ന് വൈകിട്ട് 3.30ന് തിരുവനന്തപുരത്ത് ഹോട്ടല് ഹില്ടണ് ഗാര്ഡന് ഇന്നില് നടക്കുന്ന ചടങ്ങില് പുരസ്കാരം വിതരണം ചെയ്യുമെന്ന് ട്രസ്റ്റ് ചെയര്പേഴ്സണ് സീതാലക്ഷ്മി ദേവ്, മാനേജിങ് ട്രസ്റ്റി ഡോ. ജ്യോതിദേവ് കേശവദേവ്, അവാര്ഡ് കമ്മിറ്റി ചെയര്മാന്മാരായ ഡോ. ജോര്ജ് ഓണക്കൂര്, ഡോ. ബാലഗോപാല് പി.ജി., അവാര്ഡ്കമ്മിറ്റി അംഗങ്ങളായ ഡോ. വിജയകൃഷ്ണന്, ഡോ. തോമസ് മാത്യു, ഡോ. അരുണ് ശങ്കര് എന്നിവര് പത്രസമ്മേളനത്തില് അറിയിച്ചു.
