കൊച്ചി: അമ്പലമേട്ടിലെ കൊച്ചിന് റിഫൈനറി പ്രദേശത്ത് തീപിടുത്തം. ഭാരത് പെട്രോളിയത്തിന്റെ ബിപിസിഎല് ഹൈടെന്ഷന് ലൈനില് പൊട്ടിത്തെറിയുണ്ടായി.
അപകടത്തെ തുടര്ന്ന് പ്രദേശത്താകെ പുകയും ദുര്ഗന്ധവുമുയര്ന്നു. റിഫൈനറിക്ക് മുന്നില് നാട്ടുകാര് പ്രതിഷേധിച്ചു. റോഡ് ഉപരോധിക്കുകയും ചെയ്തു. റിഫൈനറിയുടെ മതിലിനോട് ചേര്ന്നുള്ള ഹൈ ടെന്ഷന് ലൈന് ആണ് പൊട്ടിത്തെറിച്ചത്.
ഭൂമിക്ക് അടിയിലൂടെ കടന്ന് പോകുന്ന ഹൈ ടെന്ഷന് ലൈനാണ് തീ പിടിച്ചു പൊട്ടിത്തെറിച്ചതെന്നാണ് പ്രാഥമിക നിഗമനം. ബിപിസിഎല് അഗ്നിരക്ഷ സംഘം തീ അണയ്ക്കാന് തുടങ്ങി. പുകയും ദുര്ഗന്ധവും രൂക്ഷമായതിനാല് വീടുകളിലേക്ക് മടങ്ങാന് സാധിക്കില്ലെന്ന് നാട്ടുകാര് പറഞ്ഞു.
പ്രദേശവാസികളെ മറ്റൊരു സ്ഥലത്തേക്ക് മാറ്റിപ്പാര്പ്പിക്കാമെന്ന് ബിപിസിഎല് അറിയിച്ചതായി സബ് കളക്ടര് പറഞ്ഞു.ദേഹാസ്വാസ്ഥ്യത്തെ തുടര്ന്ന് ആശുപത്രിയില് പ്രവേശിപ്പിക്കപ്പെട്ടവര്ക്ക് ചികിത്സയ്ക്കുള്ള പണം നല്കാമെന്ന് ബിപിസിഎല് അറിയിച്ചു.
ഹൈടെന്ഷന് ലൈനിലെ പ്ലാസ്റ്റിക് വയറുകള് കത്തിയതാണ് രൂക്ഷഗന്ധം ഉണ്ടാകാന് കാരണമെന്ന് സബ് കളക്ടര് അറിയിച്ചു. തീ ഏറെക്കുറെ കെടുത്തിയെന്നും അദ്ദേഹം വ്യക്തമാക്കി.
