ന്യൂദല്ഹി: 2025-26 അധ്യയന വര്ഷത്തേക്ക് പുതിയ മെഡിക്കല് കോളേജുകള്ക്ക് അംഗീകാരമോ, സീറ്റ് വര്ദ്ധനയോ ഉണ്ടാകില്ലെന്ന് ദേശീയ മെഡിക്കല് കമ്മീഷന് (എന്എംസി) വ്യക്തമാക്കി. വിവിധ സംസ്ഥാനങ്ങളിലായി 40 മെഡിക്കല് കോളേജുകളില് സി.ബി.ഐ നടത്തിയ റെയ്ഡുകളുടെ പശ്ചാത്തലത്തിലാണ് മെഡിക്കല് വിദ്യാഭ്യാസ മേഖലയിലെ സമഗ്രത പുനഃസ്ഥാപിക്കുക എന്ന ലക്ഷ്യത്തോടെയുള്ള ഈ നീക്കം. നിലവിലുള്ള സ്ഥാപനങ്ങള് നിര്ദ്ദിഷ്ട മാനദണ്ഡങ്ങള് പാലിക്കുന്നുണ്ടെന്ന് ഉറപ്പാക്കാന്, വരും ആഴ്ചകളില് പരിശോധനകള് നടത്താന് എന്എംസി മുതിര്ന്ന പ്രൊഫസര്മാരുടെ സംഘങ്ങളെ വിന്യസിക്കും. എല്ലാ മെഡിക്കല് കോളേജുകളും എന്എംസി മാനദണ്ഡങ്ങള് കര്ശനമായി പാലിക്കണമെന്ന് മുന്നറിയിപ്പ് നല്കിയിട്ടുണ്ട്.
അടിസ്ഥാന സൗകര്യങ്ങള്, യോഗ്യതയുള്ള ഫാക്കല്റ്റി, മതിയായ പരിചരണ സൗകര്യങ്ങള് എന്നിവയില്ലാത്ത സ്ഥാപനങ്ങള്ക്ക് അംഗീകാരം നല്കിയതില് അഴിമതി നടന്നുവെന്ന ആക്ഷേപത്തെത്തുടര്ന്നായിരുന്നു സിബി ഐ റെയ്ഡ്. എന്എംസിയിലെ ഉദ്യോഗസ്ഥര്ക്ക് കൈക്കൂലി നല്കി നിരവധി സ്ഥാപനങ്ങള് അംഗീകാരങ്ങള് നേടിയിട്ടുണ്ടെന്ന് ഉദ്യോഗസ്ഥര് പറഞ്ഞു. ഇതുവരെ കേന്ദ്ര, സംസ്ഥാന ആരോഗ്യ വകുപ്പുകളില് നിന്നുള്ള 11 പേര് ഉള്പ്പെടെ 36 പേരെ അറസ്റ്റ് ചെയ്തിട്ടുണ്ട്.
