തിരുവനന്തപുരം: സംസ്ഥാന സര്ക്കാര് പിഎംശ്രീ പദ്ധതി നടപ്പാക്കാത്തതിനെ തുടര്ന്ന് സമഗ്ര ശിക്ഷ അഭിയാന് കേരള (എസ്എസ്കെ) കൂടുതല് പ്രതിസന്ധിയിലേക്ക്. 60 ശതമാനം കേന്ദ്രവും 40 ശതമാനം സംസ്ഥാനവും ഫണ്ട് അനുവദിച്ചാണ് എസ്എസ്കെ പ്രവര്ത്തനങ്ങള് നടത്തുന്നത്. സംസ്ഥാന സര്ക്കാരിന്റെ ദുരഭിമാനം മൂലം പിഎംശ്രീ പദ്ധതിയില് ഒപ്പിടാത്തതിനാലാണ് പ്രതിസന്ധി രൂക്ഷമായത്. വിദ്യാഭ്യാസ വകുപ്പിലാണെങ്കില് നിത്യചെലവിനു പോലും പണം ഇല്ല.
എസ്എസ്കെയിലെ സ്പെഷലിസ്റ്റ് അദ്ധ്യാപകര്ക്കും ജീവനക്കാര്ക്കും ശമ്പളം മുടങ്ങിയിട്ട് മാസങ്ങളായി. ഫണ്ടിന്റെ അപര്യാപ്തത മൂലം ഭിന്നശേഷിക്കാരായ ഒന്നേകാല് ലക്ഷത്തോളം വിദ്യാര്ത്ഥികളും ദുരിതത്തിലാണ്. 2500 സ്പെഷല് എഡ്യൂക്കേറ്റര്മാര് ഉള്പ്പെടെ 6300 ജീവനക്കാരാണ് എസ്എസ്കെയില് ഉള്ളത്. രണ്ട് മാസമായി ശമ്പളം മുടങ്ങിയതോടെ പ്രതിസന്ധിയിലാണ് ഇവര്. മെയ്, ജൂണ് മാസങ്ങളിലെ ശമ്പളമാണ് മുടങ്ങിയത്.
എസ്എസ്കെയില് ആഴ്ചയില് മൂന്ന് ദിവസമാണ് സ്പെഷലിസ്റ്റ് അധ്യാപകര് ജോലിചെയ്യുന്നത്. മാസത്തില് 11,600 രൂപയാണ് വേതനം. താല്ക്കാലിക, കരാര് ജീവനക്കാരില് ഭൂരിഭാഗം പേര്ക്കും 20,000 രൂപ മുതല് 25,000 രൂപ വരെയാണ് മാസ വേതനം.
163 ബിആര്സികളിലായി മറ്റ് വിദ്യാലയങ്ങളിലെ അധ്യാപക തസ്തികകളില് നിന്ന് ഡെപ്യൂട്ടേഷന് വാങ്ങി എസ്എസ്കെയില് ജോലി ചെയ്യുന്നവരുടെ ശമ്പളവും നല്കിയിട്ടില്ല.
പ്രതിസന്ധിയിലായതോടെ പലരും ജോലി ഉപേക്ഷിച്ച് മറ്റ് ജോലികള് സ്വീകരിച്ചു. അതേസമയം സര്ക്കാരിന്റെ പിടിവാശി മൂലം ഭിന്നശേഷി വിദ്യാര്ത്ഥികളുടെ പഠനത്തിനായുള്ള ഫണ്ടുകളും നിലച്ചിരിക്കുകയാണ്. ഭിന്നശേഷി വിഭാഗത്തില്പ്പെട്ട ഒന്നേകാല് ലക്ഷത്തോളം വിദ്യാര്ഥികളാണ് സംസ്ഥാനത്തുള്ളത്. ഇവര്ക്കുള്ള പദ്ധതികള്ക്കായി വര്ഷം 120 കോടി രൂപയാണ് എസ്എസ്കെ വഴി ചെലവഴിക്കുന്നത്. ഫണ്ട് ലഭിക്കാതെയായതോടെ ഭിന്നശേഷിക്കാരും പ്രതിസന്ധിയിലാണ്. ഭിന്നശേഷിക്കാരുടെ പഠനത്തിനായി വിവിധ ഉപകരണങ്ങള്ക്കുപുറമേ, സ്പെഷല് എജ്യൂക്കേറ്റര്മാരുടെ സേവനവും എസ്എസ്കെ നല്കുന്നുണ്ട്. ഇടുക്കി, വയനാട്, പാലക്കാട് ജില്ലകളിലെ വനവാസി മേഖലകളിലും സംസ്ഥാനത്തെ ഉള്നാടന് പ്രദേശങ്ങളിലുമുള്ള കുട്ടികളെ പ്രത്യേകം വാഹനമേര്പ്പെടുത്തിയും വൊളന്റിയര്മാരെ നിയോഗിച്ചുമാണ് സ്കൂളൂകളിലെത്തിക്കുന്നത്. ഇതിനായി ഓരോകുട്ടിക്കും മാസം 600 രൂപവീതം എസ്എസ്കെ ചെലവഴിക്കുന്നു. ഇത്തരത്തില് പഠനസഹായം ലഭിക്കുന്ന 15,000 കുട്ടികളുണ്ട്.
കണ്ണൂര്, മലപ്പുറം, പാലക്കാട്, ഇടുക്കി, പത്തനംതിട്ട ജില്ലകളില് ഏഴ് ഹോസ്റ്റലും നടത്തുന്നുണ്ട്. ഇവിടങ്ങളില് പട്ടികവിഭാഗത്തിലുള്ള 350 പേര് താമസിച്ചു പഠിക്കുന്നു. ഇതുകൂടാതെ, കിടപ്പുരോഗികളായ കുട്ടികള്ക്കും എസ്എസ്കെ വീട്ടില് പഠനാവസരമൊരുക്കുന്നു. പട്ടികവിഭാഗത്തിലും ദാരിദ്ര്യരേഖയ്ക്കുതാഴെയുമുള്ള ആണ്കുട്ടികള്ക്കും എട്ടുവരെ പഠിക്കുന്ന പെണ്കുട്ടികള്ക്കും യൂണിഫോം നല്കുന്നതും എസ്എസ്കെയാണ്. എട്ടുവരെയുള്ള ക്ലാസുകളിലെ പാഠപുസ്തകങ്ങളുടെ അച്ചടിച്ചെലവും എസ്എസ്കെ വഹിക്കുന്നു. പ്രതിസന്ധിയെ തുടര്ന്ന് എസ്എസ്കെ നല്കി വരുന്ന സഹായമെല്ലാം നിലച്ച അവസ്ഥയിലാണ്. ഫണ്ട് മുടങ്ങിയതോടെ അധ്യാപകര്ക്കൊപ്പം ഒന്നേകാല് ലക്ഷത്തോളം വിദ്യാര്ത്ഥികളും ദുരിതത്തിലായിരിക്കുകയാണ്.
ജന്മഭൂമി ഓണ്ലൈന്