തിരുവനന്തപുരം: മെഡിക്കല് കോളേജിലെ ഉപകരണ ക്ഷാമം സംബന്ധിച്ച് യൂറോളജി വിഭാഗം മേധാവി ഡോ ഹാരിസ് നടത്തിയ തുറന്നുപറച്ചില് അന്വേഷിക്കാനായി നാലംഗ സമിതിയെ നിയോഗിക്കാന് മെഡിക്കല് വിദ്യാഭ്യാസ ഡയറക്ടര് ആരോഗ്യവകുപ്പിന് ശുപാര്ശ നല്കി.തിരുവനന്തപുരം മെഡിക്കല് കോളേജ് പ്രിന്സിപ്പലും കോട്ടയം മെഡിക്കല് കോളേജ് സൂപ്രണ്ടും സമിതിയില് ഉണ്ടാകും.മെഡിക്കല് വിദ്യാഭ്യാസ ഡയറക്ടറുടെ ശുപാര്ശയില് ആരോഗ്യവകുപ്പ് ഉടന് ഉത്തരവ് ഇറക്കിയേക്കും.
മെഡിക്കല് കോളേജിലെ ഉപകരണക്ഷാമത്തെക്കുറിച്ച് ഒരു വര്ഷം മുന്പ് ആരോഗ്യമന്ത്രിയുടെ ഓഫീസിനെ ഉള്പ്പെടെ അറിയിച്ചിരുന്നെന്ന് ഡോ ഹാരിസ് പറഞ്ഞു. എല്ലാ വിഭാഗത്തിലും പ്രശ്നങ്ങളുണ്ടെന്നും പല വകുപ്പ് മേധാവിമാരും അത് തുറന്ന് പറയാത്തത് ഭയംകൊണ്ടാണെന്നുമാണ് ഡോ ഹാരിസ് വെളിപ്പെടുത്തിയത്.
തനിക്കും ആദ്യഘട്ടത്തില് ഭയമുണ്ടായിരുന്നുവെന്ന് ഡോ ഹാരിസ് പറഞ്ഞു.രോഗികളോടുള്ള കടപ്പാടും കടമയും ഓര്ത്തപ്പോള് ആ ഭയത്തിന് അര്ഥമില്ലെന്ന് തോന്നിയെന്നും അദ്ദേഹം വെളിപ്പെടുത്തി.
ഗുരുതര പ്രശ്നങ്ങളുമായി വരുന്ന രോഗികളുടെ ഓപ്പറേഷന് അടക്കം മാറ്റിവെയ്ക്കേണ്ടി വരികയാണെന്നും മികച്ച ചികിത്സ നല്കാന് ഡോക്ടര്മാര് തയ്യാറായിട്ട് പോലും അനങ്ങാപ്പാറ പോലെ ബ്യൂറോക്രസിയുടെ മതില് മുന്നില് നില്ക്കുകയാണെന്നും ഡോ ഹാരിസ് കുറ്റപ്പെടുത്തിയിരുന്നു.
എന്നാല് ഡോക്ടറിന്റേത് വൈകാരിക പ്രതികരണമാണെന്നും മൊത്തം സംവിധാനത്തെ നാണം കെടുത്താന് വേണ്ടി പോസ്റ്റിട്ടതാണെന്നുമായിരുന്നു ഡിഎംഇയുടെ പ്രതികരണം.
