മുംബൈ: ബിസിനസുകാരന്‍ എന്ന നിലയില്‍ തന്റെ ജീവിതത്തില്‍ എടുത്ത ഏറ്റവും വലിയ ‘റിസ്ക്’ ജിയോ ആയിരുന്നുവെന്ന് വെളിപ്പെടുത്തി റിലയന്‍സ് ചെയർമാൻ മുകേഷ് അംബാനി. സാമ്പത്തികമായി പരാജയപ്പെട്ടിരുന്നുവെങ്കിൽ പോലും, ഇന്ത്യയെ ഡിജിറ്റലായി പരിവർത്തനം ചെയ്തത കടമ നിര്‍വ്വഹിച്ചു എന്ന് കണക്കാക്കുമായിരുന്നുവെന്നും മുകേഷ് അംബാനി.
പ്രമുഖ അമേരിക്കന്‍ മാനേജ്മെന്‍റ് കൺസൾട്ടൻസിയായ മക്കിൻസിയുമായുള്ള അഭിമുഖത്തിലാണ് അംബാനി റിലയൻസിന്റെ ബിസിനസ് തത്വങ്ങളും ഭാവിയെക്കുറിച്ചുള്ള കാഴ്ചപ്പാടുകളും പങ്കുവെച്ചത്.
ജിയോ എന്ന വലിയ റിസ്ക്
“ഞങ്ങൾ എപ്പോഴും വലിയ റിസ്ക്കുകൾ എടുത്തിട്ടുണ്ട്. അതിൽ ഏറ്റവും വലുത് ജിയോ ആയിരുന്നു. സ്വന്തം പണമായിരുന്നു അതിന് നീക്കിവെച്ചത്. ഞാനായിരുന്നു ഭൂരിഭാഗം ഓഹരിയുടെയും ഉടമ,” അംബാനി പറഞ്ഞു. അക്കാലത്ത്, ഇന്ത്യ ഇത്രയും വലിയ ഡിജിറ്റൽ സാങ്കേതികവിദ്യയിലേക്ക് പരിവര്‍ത്തനം ചെയ്യാറായോ എന്ന് പല സാമ്പത്തിക വിദഗ്ധരും സംശയം പ്രകടിപ്പിച്ചിരുന്നു.
“പദ്ധതി സാമ്പത്തികമായി വിജയിച്ചില്ലെങ്കിൽ പോലും കുഴപ്പമില്ലെന്ന് ഞാൻ റിലയന്‍സിന്റെ ഡയറക്ടര്‍ ബോർഡിനോട് പറഞ്ഞു. കാരണം, ഇന്ത്യയെ പൂർണ്ണമായും ഡിജിറ്റലൈസ് ചെയ്യാന്‍ കഴിഞ്ഞു എന്ന ചാരിതാര്‍ത്ഥ്യം ഉണ്ടാകും. റിലയൻസ് ഇന്ത്യയ്‌ക്ക് നൽകുന്ന ഏറ്റവും വലിയ ജീവകാരുണ്യ പ്രവർത്തനമായി അത് മാറും,” അദ്ദേഹം വിശദമാക്കി.
ധിരുഭായ് അംബാനിയുടെ വാക്കുകള്‍
“അച്ഛന്‍ ധീരുഭായ് അംബാനിയുടെ ഉപദേശമാണ് എപ്പോഴും വഴികാട്ടിയിരുന്നത്. കോടീശ്വരനാകാൻ വേണ്ടി ഒരു ബിസിനസ്സ് തുടങ്ങിയാൽ നിങ്ങൾ ഒരു വിഡ്ഢിയാണെന്നും, നിങ്ങൾ ഒരിക്കലും അവിടെ എത്തില്ലെന്നും അച്ഛൻ പറയുമായിരുന്നു. എന്നാൽ, നൂറുകോടി ജനങ്ങളെ സ്വാധീനിക്കാൻ വേണ്ടിയാണ് നിങ്ങൾ ബിസിനസ്സ് തുടങ്ങുന്നതെങ്കിൽ, നിങ്ങൾക്ക് വിജയിക്കാൻ നല്ല സാധ്യതയുണ്ട്,” – അച്ഛന്‍ ധിരുഭായ് അംബാനിയുടെ വാക്കുകള്‍ സ്മരിച്ചുകൊണ്ട് മുകേഷ് അംബാനി പറഞ്ഞു.
“റിലയൻസ് ഇപ്പോൾ പുതിയ പുനരുപയോഗ ഹരിത ഊർജ്ജ രംഗത്തേക്ക് ചുവടുവെക്കുന്നതും ഈ ആശയത്തില്‍ അടിയുറച്ചാണ്. ലോകത്തിലെ ഏറ്റവും വലിയ പുനരുപയോഗ ഹരിത ഊർജ്ജ നിർമ്മാണ സംവിധാനങ്ങളിലൊന്നാണ് ഞങ്ങൾ നിർമ്മിക്കുന്നത്. സൗരോർജ്ജം, ബാറ്ററികൾ, ഹൈഡ്രജൻ, ബയോ എനർജി എന്നിവയെല്ലാം ഇതിൽ ഉൾപ്പെടുന്നു. കാലാവസ്ഥാ വ്യതിയാനം എന്ന വലിയ പ്രതിസന്ധിയിൽ നിന്ന് ഭൂമിയെ രക്ഷിക്കാനുള്ള ഞങ്ങളുടെ സംഭാവനയാണിത്,” – മുകേഷ് അംബാനി പറയുന്നു.
റിലയൻസ് ഇപ്പോൾ ഒരു ഡീപ്-ടെക് അഡ്വാൻസ്ഡ് മാനുഫാക്ചറിംഗ് കമ്പനിയായി മാറിക്കൊണ്ടിരിക്കുകയാണെന്നും, 5ജി സാങ്കേതികവിദ്യ പൂർണ്ണമായും തദ്ദേശീയമായി വികസിപ്പിച്ചത് ഇതിന്റെ തെളിവാണെന്നും അംബാനി പറഞ്ഞു.
പ്രതികരിക്കാൻ ഇവിടെ എഴുതുക: