കാസര്‍കോട്: സ്ഥലം വാങ്ങിയതുമായി ബന്ധപ്പെട്ട് ആരോപണം ഉയര്‍ന്നതിനെ തുടര്‍ന്ന് സിപിഎം ചെറുവത്തൂര്‍ ഏരിയാ സെക്രട്ടറി സ്ഥാനത്ത് നിന്ന് മാധവന്‍ മണിയറയെ നീക്കി. കെ ബാലകൃഷ്ണനാണ് പുതിയ ഏരിയാ സെക്രട്ടറി. സ്ഥലം വാങ്ങിയതില്‍ പാര്‍ട്ടി മാനദണ്ഡം പാലിക്കാത്തതിലാണ് നീക്കിയതെന്നാണ് പാര്‍ട്ടി വിശദീകരണം. നീലേശ്വരം ബ്ലോക്ക് പഞ്ചായത്ത് പ്രസിഡന്റാണ് നിലവില്‍ മാധവന്‍ മണിയറ.
നേരത്തെ ചെറുവത്തൂര്‍ പഞ്ചായത്ത് പ്രസിഡന്റായിരിക്കെ നടത്തിയ സ്ഥലം ഇടപാടിനെ തുടര്‍ന്നാണ് നടപടി. അഞ്ച് ലക്ഷത്തിന് മുകളില്‍ മൂല്യമുള്ള വസ്തുവോ, വാഹനമോ വാങ്ങുന്ന നേതാക്കള്‍ ഇക്കാര്യം ആദ്യം പാര്‍ട്ടിയെ അറിയിച്ച് അനുമതി വാങ്ങണമെന്നാണ് പാര്‍ട്ടി ചട്ടം.
എന്നാല്‍ സുഹൃത്തുമായി ചേര്‍ന്ന് കരിന്തളത്ത് രണ്ടര ഏക്കര്‍ സ്ഥലം വാങ്ങിയതില്‍ മാധവന്‍ മണിയറ പാര്‍ട്ടി അനുമതി വാങ്ങിയിരുന്നില്ല. 12.5 ലക്ഷം രൂപ വീതം ചെലവിട്ട് ആകെ 25 ലക്ഷം രൂപയ്‌ക്കാണ് മാധവനും സുഹൃത്തും സ്ഥലം വാങ്ങിയത്. ഇത് സംബന്ധിച്ച് അനധികൃത സ്വത്ത് സമ്പാദനമെന്ന് പാര്‍ട്ടിയില്‍ ആരോപണം ഉയര്‍ന്നിരുന്നു. എന്നാല്‍ കൃഷി ആവശ്യത്തിനായി വാങ്ങിയ ഭൂമിയെന്നാണ് മാധവന്‍ മണിയറ പാര്‍ട്ടിയില്‍ വിശദീകരിച്ചത്.
പ്രതികരിക്കാൻ ഇവിടെ എഴുതുക: