തിരുവനന്തപുരം: കല്ലമ്പലത്ത് 10 കിലോയിലധികം കഞ്ചാവ് ശേഖരവുമായി യുവാവ് ഡാന്‍സാഫ് സംഘത്തിന്റെ പിടിയിലായി.തിരുവനന്തപുരം ബാലരാമപുരം തണ്ണിക്കുഴി സ്വദേശി ബേബി ലാന്റില്‍ അരുണ്‍ പ്രകാശ് (42)ആണ് ഇരുചക്ര വാഹനത്തില്‍ കഞ്ചാവ് കടത്താന്‍ ശ്രമിക്കവെ കഞ്ചാവുമായി പിടിയിലായത്.
ഇരുചക്ര വാഹനത്തില്‍ ആന്ധ്രപ്രദേശില്‍ നിന്നും രണ്ട് വലിയ ട്രാവല്‍ ബാഗുകളില്‍ കഞ്ചാവ് ശേഖരവുമായി തിരുവനന്തപുരത്തേക്ക് വരികയായിരുന്നു അരുണ്‍ പ്രകാശ്.ദിവസങ്ങളായി നിരീക്ഷണത്തിലായിരുന്നു ഇയാള്‍. വാഹനത്തില്‍ പിന്തുടര്‍ന്നെത്തിയ ഡാന്‍സാഫ് സംഘം കല്ലമ്പലത്ത് തട്ടുപാലത്തിന് സമീപത്ത് വച്ച് വാഹനം തടഞ്ഞാണ് പിടികൂടിയത്.
അരുണ്‍ പ്രകാശ് വിശാഖപട്ടണത്ത് മയക്കുമരുന്ന് കേസില്‍പ്പെട്ട് നാലര വര്‍ഷം ആന്ധ്ര ജയിലില്‍ കിടന്നിരുന്നു. ശിക്ഷ കഴിഞ്ഞ് ഇറങ്ങിയതിന് പിന്നാലെ വീണ്ടും ഇയാള്‍ കഞ്ചാവ് കടത്താന്‍ ശ്രമിച്ച കേസില്‍ ബാലരാമപുരത്ത് അറസ്റ്റിലായിരുന്നു. കേസില്‍ 60 ദിവസം ജയിലില്‍ കിടന്ന ഇയാള്‍ ജാമ്യത്തില്‍ പുറത്തിറങ്ങിയ ശേഷമാണ് ഇപ്പോള്‍ വീണ്ടും കഞ്ചാവ് കടത്താന്‍ ശ്രമിച്ചത്.
ഓപ്പറേഷന്‍ ഡീ-ഹണ്ടിന്റെ ഭാഗമായി നടത്തി വരുന്ന കര്‍ശന പരിശോധനയിലാണ് റൂറല്‍ ജില്ലാ പൊലീസ് മേധാവി സുദര്‍ശന്റെ നിയന്ത്രണത്തിലുള്ള ഡാന്‍സാഫ് സംഘം പ്രതിയെ പിടികൂടിയത്. പ്രതിയെ കല്ലമ്പലം പൊലീസിന് കൈമാറി.
പ്രതികരിക്കാൻ ഇവിടെ എഴുതുക: