ന്യൂദല്ഹി: ബിജെപി കേരള സംസ്ഥാന പ്രസിഡന്റും ഇലക്ട്രോണിക്സ് ആന്ഡ് ഐടി, നൈപുണ്യ വികസന, സംരംഭക, ജലശക്തി വകുപ്പുകളുടെ മുന് കേന്ദ്ര സഹമന്ത്രിയുമായ രാജീവ് ചന്ദ്രശേഖര് ഓക്സ്ഫോര്ഡ് സര്വകലാശാല സന്ദര്ശിക്കും. ജൂണ് 21ന് നടക്കുന്ന ഓക്സ്ഫോര്ഡ് ഇന്ത്യ ഫോറത്തില് പ്രഭാഷണം നടത്തുന്നതിനാണ് സന്ദര്ശനം.
ബൗദ്ധിക പ്രമുഖര്, വ്യവസായ വിദഗ്ധര്, വിദ്യാര്ത്ഥികള് മുതലായ സമൂഹങ്ങളെ ഒരുകുടക്കീഴില് അണിനിരത്തി ആധുനിക ഭാരതം കൈവരിച്ച പുരോഗതിയും നൂതനാശയങ്ങളും ലോകത്തിനു മുന്നില് ഉയര്ത്തിക്കാട്ടുന്നതിനുള്ള വേദിയായി പ്രവര്ത്തിക്കുന്ന ഓക്സ്ഫോര്ഡ് ഇന്ത്യ ഫോറം യൂറോപ്പിലെ ഒരു സര്വകലാശാലക്ക് കീഴിലെ ഇത്തരത്തിലുള്ള ഏറ്റവും ബൃഹത്തായ അന്താരാഷ്ട്ര വേദിയാണ്.
ശാസ്ത്ര സാങ്കേതിക മേഖലകളിലെ ഗവേഷണം, നയരൂപീകരണം എന്നീ മേഖലകളില് ഓക്സ്ഫോര്ഡ് സര്വകലാശാലയും ഭാരത വ്യാപാര സമൂഹവും തമ്മിലുള്ള സഹകരണം യാഥാര്ത്ഥ്യമാക്കുന്നതിനുദ്ദേശിച്ച് സംഘടിപ്പിക്കുന്ന പ്രഭാഷണ പരമ്പരകളുടെ ഭാഗമായാണ് രാജീവ് ചന്ദ്രശേഖര് ഓക്സ്ഫോര്ഡ് ഇന്ത്യ ഫോറം 2025-ല് പങ്കെടുക്കുന്നത്.
അന്താരാഷ്ട്ര പ്രമുഖരെ ഉള്പ്പെടുത്തി സംഘടിപ്പിക്കുന്ന സമ്മേളനം നിര്മിത ബുദ്ധി, ടെക്നോളജി രംഗങ്ങളിലെ മികച്ച പ്രതിഭകളെ കണ്ടെത്തുന്നതിന് കൂടിയുള്ള വേദിയാണ്. ജൂണ് 23ന് അദ്ദേഹം ഭാരതത്തിലേക്ക് മടങ്ങും.
