മുംബൈ: ഇന്ത്യയിൽ നിന്ന് ഇന്തോനേഷ്യയിലേക്ക് പോകുകയായിരുന്ന എയർ ഇന്ത്യ വിമാനത്തിന് അതിന്റെ റൂട്ട് വഴിതിരിച്ചുവിടേണ്ടി വന്നു. ഈ വിമാനം തിരികെ ന്യൂദൽഹിയിൽ ലാൻഡ് ചെയ്തു. ഇന്തോനേഷ്യയിലെ ബാലി വിമാനത്താവളത്തിന് സമീപം നടന്ന അഗ്നിപർവ്വത സ്ഫോടനം കാരണമാണ് എയർ ഇന്ത്യ വിമാനത്തിന് ദൽഹിയിലേക്ക് മടങ്ങേണ്ടിവന്നത്.
വിമാനം സുരക്ഷിതമായി ദൽഹിയിലേക്ക് തിരികെ ലാൻഡ് ചെയ്തെന്നും എല്ലാ യാത്രക്കാരെയും സുരക്ഷിതമായി ഇറക്കിയതായും എയർ ഇന്ത്യ അറിയിച്ചു.
“ജൂൺ 18 ന്, ദൽഹിയിൽ നിന്ന് ബാലിയിലേക്ക് പോകുകയായിരുന്ന എയർ ഇന്ത്യ വിമാനം AI2145 ബാലി വിമാനത്താവളത്തിന് സമീപം അഗ്നിപർവ്വത സ്ഫോടനം ഉണ്ടായതായി റിപ്പോർട്ടുകൾ ലഭിച്ചതിനാൽ സുരക്ഷാ കാഴ്ചപ്പാടിൽ ദൽഹിയിലേക്ക് മടങ്ങാൻ നിർദ്ദേശിച്ചു” – എയർ ഇന്ത്യ ഇറക്കിയ പ്രസ്താവനയിൽ പറയുന്നു.
ഇതിനു പുറമെ യാത്രക്കാർക്ക് ഹോട്ടൽ താമസ സൗകര്യം നൽകിയിട്ടുണ്ടെന്ന് എയർ ഇന്ത്യ അറിയിച്ചു. കൂടാതെ ടിക്കറ്റ് റദ്ദാക്കിയതിനോ യാത്ര പുനഃക്രമീകരിച്ചതിനോ അധിക നിരക്ക് ഈടാക്കാതെ യാത്രക്കാർക്ക് മുഴുവൻ തുകയും തിരികെ നൽകാനുള്ള സൗകര്യവും നൽകുന്നുണ്ടെന്നും കമ്പനി അറിയിച്ചു.
