വാഷിംഗ്ടണ്: അച്ഛനെയും അമ്മയെയും താന് ജോലി ചെയ്യുന്ന യുഎസിലെ വാള്മാര്ട്ടില് കൊണ്ടുപോയി ചുറ്റിനടത്തി കാണിച്ച് മകള് ദേവശ്രീ ഭാരതീയ. ഭാരതത്തിനാകെ മാതൃക കാട്ടുന്ന മകളായി മാറിയ ദേവശ്രീ ഭാരതീയയ്ക്ക് സമൂഹമാധ്യമത്തില് കയ്യടി ഉയരുകയാണ്.
അമേരിക്കയില് എത്തിയ അച്ഛനെയും അമ്മയെയും ഭാരതീയ ശൈലിയില് വരവേല്ക്കുന്ന ദേവശ്രീ ഭാരതീയയെ ഈ യുട്യൂബ് വീഡിയോയില് കാണാം.
മഹാരാഷ്ട്ര ഇന്സ്റ്റിറ്റ്യൂട്ട് ഓഫ് ടെക്നോളജി (എംഐടി)യിലെ കംപ്യൂട്ടര് സയന്സ് വിദ്യാര്ത്ഥിനി ആയിരുന്നു ദേവശ്രീ. ഇവിടെ നാല് വര്ഷവും ഗോള്ഡ് മെഡലിസ്റ്റായിരുന്നു, ഈ കോഴ്സിലെയും ഗോള്ഡ് മെഡലിസ്റ്റ് ആയിരുന്നു ദേവശ്രീ. ഇതേ തുടര്ന്നാണ് ദേവശ്രീക്ക് ലോകത്തിലെ ഏറ്റവും വലിയ റീട്ടെയ് ലറായ വാള്മാര്ട്ട് ഹെഡ് ഓഫീസില് ജോലി ലഭിക്കുന്നത്. ഐഐടിയില് പ്രവേശനം ലഭിച്ചില്ലെങ്കിലും അത് നിങ്ങളുടെ കരിയറില് മുകളിലേക്ക് പോകുന്നതിന് തടസ്സമല്ലെന്ന് ദേവശ്രീ ഭാരതീയ പറയുന്നു.
സാധാരണ മക്കള് വലിയ ഓഫീസുകളില് ജോലി കിട്ടിയാല് അതോടെ അച്ഛനെയും അമ്മയെയും മറക്കുമ്പോഴാണ് ദേവശ്രീ ഭാരതീയ വേറിട്ട മാതൃകയായി മാറിയത്. യുഎസിലെ വാള് മാര്ട്ടിലേക്ക് കൊണ്ടുപോയി തന്റെ ഓഫീസ് അച്ഛനും അമ്മയ്ക്കും ചുറ്റിനടത്തി കാണിച്ചുകൊടുക്കുകയാണ് ദേവശ്രീ ഭാരതീയ. ഇതിന്റെ വീഡിയോ ഇന്സ്റ്റഗ്രാമില് മകള് പങ്കുവെച്ചിരുന്നു. ഏകദേശം 11 ലക്ഷം പേരാണ് ഈ വീഡിയോ കണ്ടത്.
‘മക്കളുടെ ഉയര്ച്ചയില് അഭിമാനിക്കുന്ന മാതാപിതാക്കളെയാണ് ഏത് മക്കളും ആഗ്രഹിക്കുന്നത്. ഇന്ത്യക്കാരായ എന്റെ മാതാപിതാക്കള് ആദ്യമായി യുഎസിലെ എന്റെ ഓഫീസ് സന്ദര്ശിക്കുകയാണ്’ എന്ന് കുറിച്ചാണ് ദേവശ്രീ ഭാരതീയ ഈ വീഡിയോ പങ്കുവെച്ചിരിക്കുന്നത്.
മറ്റുള്ളവരുമായി തങ്ങളെ താരതമ്യം ചെയ്തുകൊണ്ടല്ല നിങ്ങളുടെ വിജയം അളക്കേണ്ടതെന്ന് ദേവശ്രീ മറ്റൊരു വീഡിയോയില് പറയുന്നു. പകരം നിങ്ങളുടെ ജീവിതത്തിന്റെ തുടക്കത്തില് നിന്നും നിങ്ങള് മുന്നേറിയോ എന്ന് മാത്രമേ നോക്കാന് പാടുള്ളൂ. ചെയ്യുന്ന കാര്യത്തില് നിങ്ങള്ക്ക് സന്തോഷം കിട്ടിയോ എന്ന് നോക്കണമെന്നും ദേവശ്രീ ഭാരതീയ ഉപദേശിക്കുന്നു. 60000 രൂപ വിലയുള്ള സ്കൂട്ടര് ഓടിച്ച് ഇന്ത്യയില് നടന്ന താനിപ്പോള് ടെസ് ല കാര് അമേരിക്കയില് ഓടിക്കുമ്പോള് ആ ജീവിതത്തിലെ മുന്നേറ്റം നമ്മള് ആസ്വദിക്കണം. അതല്ലാതെ, കൂട്ടുകാരയവര്ക്ക് ഐഐടിയില് അഡ്മിഷന് കിട്ടി, ആ കൂട്ടുകാരന് മാസം 25 ലക്ഷം രൂപ ശമ്പളമുള്ള ജോലി കിട്ടി എന്നൊന്നും കണക്കാക്കി നിരാശപ്പെടരുതെന്നും ദേവശ്രീ ഉപദേശിക്കുന്നു.
